सपोर्ट लघुवित्तको नाफा १४८.३७% ले वृद्धि, आम्दानी र ईपीएस कति ?

काठमाण्डौ । खुद ब्याज आम्दानी वृद्धि भएसँगै सपोर्ट लघुवित्त वित्तीय संस्था लिमिटेडको खुद नाफामा सुधार आएको छ  । चालु आवको तेस्रो त्रेमाससम्ममा संस्थाले ३ करोड ६ लाख रुपैयाँ खुद नाफा आर्जन गरेको छ । यो रकम अघिल्लो आवको तुलनामा १४८.३७ प्रतिशतले बढी हो ।  

अघिल्लो आवको तेस्रो त्रैमाससम्म भने संस्थाले १ करोड २३ लाख रुपैयाँ खुद नाफा आर्जन गरेको थियो ।  

संस्थाको खुद ब्याज आम्दानी पनि ७७.४६ प्रतिशतले बढेर ८ करोड ७२ लाख रुपैयाँ पुगेको छ । संस्थाको सञ्चालन मुनाफा पनि बढेको छ । अघिल्लो आवको तेस्रो त्रैमाससम्म १ करोड ३३ लाख रुपैयाँ रहेको सञ्चालन मुनाफा बढेर ४ करोड ६५ लाख रुपैयाँ पुगेको छ ।  

अघिल्लो आवको तेस्रो त्रैमाससम्म ५ करोड ७९ लाख रुपैयाँ रहेको संस्थाको रिजर्भको आकार बढेर ६ करोड ४६ लाख रुपैयाँ पुगेको छ । संस्थाको खराब कर्जा अनुपात बढेको छ। संस्थाको खराब कर्जा अनुपात १.४७ प्रतिशतबाट बढेर १.६४ प्रतिशत पुगेको छ ।  

संस्थाले समीक्षा अवधिसम्म ४१ करोड ५४ लाख निक्षेप संकलन र १ अर्ब ८४ करोड रुपैयाँबराबरको कर्जा प्रवाह गरेको छ ।  

समीक्षा अवधिसम्म संस्थाको प्रतिसेयर आम्दानी(ईपीएस) ३३.३७ रुपैयाँ, प्रतिसेयर नेटवर्थ ३३.३७ रुपैयाँ, प्रतिसेयर कुल सम्पत्तिको मूल्य १ हजार ६१४.८३ रुपैयाँ,मूल्य आम्दानी अनुपात ७१.८० गुणा र तरलता अनुपात १०.४४ प्रतिशत कायम भएको छ ।