फेड अध्यक्षलाई बर्खास्त गर्ने कुनै मनसाय छैनः ट्रम्प

काठमाण्डौ । अमेरिकी राष्ट्रपति डोनाल्ड ट्रम्पले केन्द्रीय बैंक,‘फेडरल रिजर्भ(फेड)का अध्यक्ष जेरोमी पावेललाई बर्खास्त गर्ने आफ्नो कुनै मनसाय नभएको बताएका छन् । पछिल्लो समय पावेलको चर्को विरोध गर्दै आएका ट्रम्पले मंगलबार ओभल अफिसमा यस्तो बताएका हुन् ।  

गत शुक्रबार अमेरिकाको ‘नेशनल इकोनोमिक काउन्सिल’का डाइरेक्टर केभिन हास्सेटले पावेललाई बर्खास्त गर्न कति सम्भव छ भनेर ट्रम्प लागिपरेको बताएपछि ट्रम्पले पावेलबारे ताजा अभिव्यक्ति दिएका हुन् ।  

यद्यपी ट्रम्पले ब्याजदर कटौती गर्ने कुरामा पावेल सक्रिय भएको हेर्न चाहेको बताएका छन् । यसका साथै ट्रम्पले चीनसँगको व्यापारिक सम्बन्ध सुधार हुनेमा आफू विश्वस्त रहेको. बताएका छन् ।  

गत साता ट्रम्पले फेड अध्यक्ष पावेललाई निकम्मा र असफल भनेका थिए । सेयर बजारमा आईरहेको निरन्तरको गिरावटपश्चात उनको यस्तो अभिव्यक्ति बाहिरिएको थियो ।  

ट्रम्पले आफ्नो पहिलो कार्यकालमा अर्थात सन् २०१७ मा पावेललाई फेडको अध्यक्ष चयन गरेका थिए । तत्कालिन राष्ट्रपति जो बाइडेनले पावेललाई सन् २०२१ को अन्त्यमा दोस्रो कार्यकालका लागि पुनः अध्यक्ष नियुक्त गरेका थिए ।  

यो वर्ष फेडले ब्याजदरमा कुनैपनि कटौती गरेको छैन । गत वर्ष भने फेडले १ प्रतिशतले ब्याजदर घटाएको थियो ।  

पावेललाई बर्खास्त गर्ने अधिकार ट्रम्पसँग भएको वा नभएको बारे स्पष्टता नरहेको जनाइएको छ । यसअघिका कुनैपनि राष्ट्रपतिले फेड अध्यषलाई बर्खास्त गरेको उदाहरण छैन ।