९६.०७% ले बढ्यो शिवम् सिमेन्टको नाफा

काठमाण्डौ । शिवम् सिमेन्ट लिमिटेडले चालु आवको तेस्रो त्रैमाससम्मको अपरिष्कृत वित्तीय विवरण सार्वजनिक गरेको छ । जसअनुसार कम्पनीले ४० करोड ५ लाख रुपैयाँ खुद नाफा आर्जन गरेको छ । यो रकम अघिल्लो आवको तुलनामा ९६.०७ प्रतिशतले बढी हो ।  

अघिल्लो आवको सोही अवधिसम्म भने कम्पनीले २० करोड ४२ लाख रुपैयाँ नाफा आर्जन गरेको थियो ।  

यद्यपी कम्पनीले बिक्री आम्दानी भने १०.०१ प्रतिशतले घटेको छ । कम्पनीले बिक्रीमार्फत ५ अर्ब ३९ करोड रुपैयाँ कमाएको छ । अघिल्लो आवको सोही अवधिमा भने कम्पनीले बिक्रीमार्फत ५ अर्ब ९९ करोड रुपैयाँ कमाएको थियो ।  

कम्पनीको अन्य आम्दानी पनि घटेको छ । अघिलल्लो आवको तेस्रो त्रैमाससम्म १७ करोड ३४ लाख रुपैयाँ रहेको अन्य आम्दानी घटेर १२ करोड ६४ लाख रुपैयाँमा सीमित बनेको छ ।  

कम्पनीले कुल खर्च भने घटाउन सफल भएको छ । अघिल्लो आवसम्म ७१ करोड २ लाख रुपैयाँबराबरको खर्च गरेको कम्पनीले चालु आवसम्म ६५ करोड ४८ लाख रुपैयाँ खर्च गरेको छ ।  

५ अर्ब ४५ करोड रुपैयाँबराबरको चुक्तापूँजी भएको कम्पनीले सेयर प्रिमियम रिजर्भका लागि ९५ करोड ६२ लाख रुपैयाँ छुट्टाएको छ । यस्तै अन्य रिजर्भका लागि ३ अर्ब ४६ करोड रुपैयाँको व्यवस्था गरेको छ ।  

समीक्षा अवधिसम्म कम्पनीको प्रतिसेयर आम्दानी(ईपीएस)९.७९ रुपैयाँ, प्रतिसेयर नेटवर्थ १८१.१० रुपैयाँ,प्रतिसेयर कुल सम्पत्तिको मूूल्य २२८.११ रुपैयाँ र तरलता अनुपात १.६२ गुणा कायम भएको छ ।