सुनको मूल्यमा आज १६ डलरको गिरावट

काठमाण्डौ । आज अन्तर्राष्ट्रिय बजारमा सुनको मूल्यमा गिरावट आएको छ । डलर केही बलियो बन्दा र रुस–युक्रेनबीच शान्ति सम्झौता हुनसक्ने सम्भावना बढेसँगै सुनको मागमा कमी आएको छ ।  

जसका कारण आज सुनको मूल्य ०.५१ प्रतिशत अर्थात १६.३९ डलरले घटेको छ ।  

यो समाचार तयार पार्दासम्म सुनको मूल्य प्रतिऔंस ३ हजार २१३ डलरमा कारोबार भईरहेको छ । अघिल्लो सेसनमा एक साताकै न्यून विन्दुबाट माथि उठ्दै डलरले पुनरागमन गरेको छ । जसका कारण डलरबाहेकका अन्य मुद्राधारकहरुलाई सुनको खरिद महङ्गो पर्न गएको छ ।  

उता रुस र युक्रेनबीच पनि युद्धविरामको सम्भावना बढेको अमेरिकी राष्ट्रपतिले बताएका छन् । यस विषयमा दुवै देशका राष्ट्रपति सकारात्मक देखिएको उनको भनाई छ । सुनलाई राजनीतिक र आर्थिक संकटको समयमा सुरक्षित लगानीको रुपमा लिइन्छ । तर विश्व राजनीतिक घटनाक्रम साम्य हुने बाटोतर्फ अग्रसर भएसँगै सुनप्रति लगानीकर्ताको आकर्षकणमा कमी आएको छ ।  

आज चाँदीको मूल्य समेत घटेको छ । चाँदी ०.१५ डलरले घट्दै प्रतिऔंस ३२.२ डलर कायम भएको छ ।