देशैभर फैलियो जेनजीको प्रदर्शन: पोखरा, इटहरी र भरतपुरमा झडप, दमकमा गोली चल्यो

काठमाण्डौ । जेनजीको प्रदर्शनले देशैभर उग्र रुप लिएको छ ।  

सरकारले सामाजिक सञ्जाल बन्द गरेपछि त्यसको विरोध तथा बढ्दो भ्रष्टाचारको समेत विरोधमा जेनजी पुस्ताले सोमबारदेखि आन्दोलनको थालनी गरेको हो । 

आन्दोलन सुरुवात भएकै दिन संघीय राजधानी काठमाण्डौ लगायतका क्षेत्र तनावग्रस्त बन्न पुगेका छन् ।  

जेनजीको प्रदर्शनमा प्रहरीले बल प्रयोग गरी अश्रुग्याँस र अन्धाधुन्ध गोली प्रहार गर्दा काठमाण्डौमा एक प्रदर्शनकारीको मृत्यु भएको छ भने ८० जनाभन्दा बढी घाइते भएका छन् ।  

प्रदर्शन उग्र बनेपछि सरकारले काठमाण्डौको बानेश्वर क्षेत्र, बालुवाटार क्षेत्र, शितल निवास क्षेत्र लगायत प्रधानमन्त्री, राष्ट्रपति, अन्य उच्च सरकारी अधिकारीको निवास  रहेको स्थान र आसपासको क्षेत्रमा कफ्र्यू आदेश जारी गरेको छ । योसँगै नेपाली सेनालाई काठमाण्डौका सडकमा उतारिएको छ । 

तर, जेनजी पुस्ताले कफ्र्यूको अवज्ञा गर्दै काठमाण्डौका विभिन्न ठाउँमा प्रदर्शनलाई जारी राखेका छन् । उनीहरुले भ्रष्टाचारको अन्त्य, भ्रष्ट नेताले सिंहदरबार छाड्नुपर्ने लगायतका माग राख्दै प्रदर्शन गरिरहेका छन् ।  

काठमाण्डौमा मात्र नभई देशभरका प्रमुख शहरी क्षेत्रमा आन्दोलन चर्किएको छ। जेनजीको आन्दोलन उग्र बनेपछि प्रधानमन्त्री केपी शर्मा ओलीको गृहनगर दमकमा प्रहरीले गोली चलाएको छ । त्यहाँ जेनजी प्रदर्शनकारी र प्रहरीबीच झडप भएको छ । केही घाइते भएका छन् ।  

कोशी प्रदेशकै इटहरीमा समेत जेनजी र प्रहरीबीच झडप भएको छ । त्यहाँका प्रदर्शनकारी समेत उग्र बनेपछि प्रहरीले बल प्रयोग गरेको दाबी गरिएको छ।  

हेटौडामा समेत प्रदर्शनकारी र प्रहरीबीच झडप भएको छ ।  

पोखराको सडकमा निस्किएका जेनजीहरुमाथि प्रहरीले बल प्रयोग गरेपछि त्यहाँको अवस्था पनि तनावपूर्ण बनेको छ । त्यहाँस्थित गण्डकी प्रदेशका मुख्यमन्त्रीको निवास र उच्च सरकारी अधिकारीको निवास क्षेत्रमा समेत प्रदर्शनकारीले तोडफोड गरेका छन् । मुख्यमन्त्री निवासमा आगजनी गर्न तम्सिएका प्रदर्शनकारीलाई रोक्न प्रहरीले लाठीचार्ज र टियर ग्यास हानेको छ ।  

उता, चितवनको भरतपुरमा पनि प्रहरीसँग प्रदर्शनकारीको झडप भएको छ । जेनजी प्रदर्शनकारीले भरतपुर महानगरपालिकाभित्र प्रवेश गरी तोडफोड गर्न खोजेपछि प्रहरीले रोकेको थियो । सो क्रममा दुईतर्फी ढुंगा हानाहान भएको थियो । प्रहरीले प्रदर्शनकारीलाई अश्रुग्याँस प्रहार गरी तितरबितर पारेको छ । हाल सो क्षेत्र तनावग्रस्त छ ।