प्रधानमन्त्री ओलीको राजीनामा माग्यो रास्वपाले, ताजा जनादेशका लागि 'अर्ली इलेक्सन'

काठमाण्डौ । राष्ट्रिय स्वतन्त्र पार्टी ९रास्वपा० ले प्रधानमन्त्री केपी शर्मा ओलीलाई तत्काल राजीनामा दिन आग्रह गर्दै ताजा जनादेशका लागि चुनाव घोषणा(अर्ली इलेक्सन) गर्न सरकारसमक्ष माग राखेको छ।

सोमबार जारी विज्ञप्तिमा पार्टीका महामन्त्री कवीन्द्र बुर्लाकोटीले जेन-जी समूहको प्रदर्शनमा भएको सरकारी दमनको कडा आलोचना गर्दै सरकारको नैतिक तथा राजनीतिक औचित्य समाप्त भइसकेको उल्लेख गरेका छन्। उनले भने, “प्रधानमन्त्रीले अब तत्काल राजीनामा दिनुपर्छ। साथै घटनाको निष्पक्ष छानबिनका लागि उच्चस्तरीय न्यायिक छानबिन आयोग गठन गरी गृहमन्त्रीसहित सबै दोषीलाई कारबाही गर्नुपर्छ।”

रास्वपाले कांग्रेस–एमाले नेतृत्वको सरकारले कुनै पनि राष्ट्रिय मुद्दामा समाधान दिन असफल भएको दाबी गरेको छ। विज्ञप्तिमा भनिएको छ, “नेपाली कांग्रेस र नेकपा एमालेको वर्चस्वमा रहेको संसद्ले राष्ट्रिय समस्या समाधान गर्न नसकेको प्रमाणित भइसकेको छ। त्यसैले हामी नयाँ जनादेशको माग गर्दछौँ।”

यस्तै पार्टीले चेतावनी दिंदै भनेको छ, “जनताको रगतमा हात धुने प्रयास अब जनताले सहने छैनन्। यो निरंकुश शासनविरुद्ध व्यापक जनप्रतिवाद हुनेछ।”