कुलमान घिसिङ र ओमप्रकाश अर्याल मन्त्री बन्दै

काठमाण्डौ । अन्तरिम सरकारको प्रधानमन्त्रीमा पूर्व प्रधानन्यायाधीश सुशीला कार्कीसँगै दुईजना मन्त्री समेत नियुक्त हुने भएका छन् ।  

शितल निवासस्थित स्रोतका अनुसार अहिलेसम्मको सहमतिअनुसार कुलमान घिसिंग र ओमप्रकाश अर्याल आजै मन्त्री नियुक्त हुनेछन् । 

प्रधानमन्त्रीको सपथ लगत्तै घिसिङ र अर्यालको समेत आजै सपथ हुनेछ ।  

उनीहरु दुईजना हाललाई विनाविभागीय मन्त्रीको रुपमा रहनेछन् । थप जेनजी अभियन्ता र नागरिक अगुवाहरुलाई समेत सरकारमा सामेल गर्ने क्रममा उनीहरुले सम्हाल्ने मन्त्रालयको टुंगो लगाइनेछ । 

मन्त्री बन्न लागेका कुलमान नेपाल विद्युत प्राधिकरणका पूर्व प्रबन्ध निर्देशक हुन् । उनलाई केपी ओली सरकारले विभिन्न आरोप लगाउँदै बर्खास्त गरेको थियो ।  

ओमप्रकाश अर्याल चाहिँ काठमाण्डौ महानगरपालिकाका मेयर बालेन शाहको कानूनी सल्लाहकार पनि हुन् । राष्ट्रपतिसँगको वार्तामा उनले जेनजीहरुको तर्फबाट निरन्तर प्रतिनिधित्व गरेका थिए ।