राष्ट्र बैंकले दुई महिनामा गर्यो कुल ६७.८५ खर्ब तरलता प्रशोचन

काठमाण्डौ । चालु आवको दुई महिनामा नेपाल राष्ट्र बैंकले कुल रु.६७ खर्ब ८५ अर्ब ६० करोड तरलता प्रशोचन गरेको छ । राष्ट्र बैंकले आज सर्वाजनिक गरेको तथ्यांक अनुसार निक्षेप सङ्कलन बोलकबोलमार्फत रु.४ खर्ब ७४ अर्ब ३५ करोड र स्थायी निक्षेप सुविधामार्फत रु.६३ खर्ब ११ अर्ब २५ करोड गरी कुल रु.६७८५ अर्ब ६० करोड (कारोबारमा आधारित) तरलता प्रशोचन गरिएको हो ।  

अघिल्लो वर्षको सोही अवधिमा मौद्रिक व्यवस्थापनका विभिन्न उपकरणमार्फत पटक–पटक गरी खुद रु.४४ खर्ब ७६ अर्ब ४५ करोड तरलता प्रशोचन गरिएको थियो ।

समीक्षा अवधिमा यस बैंकले विदेशी विनिमय बजार (वाणिज्य बैंकहरू) बाट अमेरिकी डलर १ अर्ब ६ करोड खुद खरिद गरी रु.१४९ अर्ब ४२ करोड तरलता प्रवाह गरेको छ । अघिल्लो वर्षको सोही अवधिमा विदेशी विनिमय बजारबाट अमेरिकी डलर ८३ करोड ४७ लाख खुद खरिद गरी रु.१११ अर्ब ९७ लाख तरलता प्रवाह गरेको थियो ।

समीक्षा अवधिमा अमेरिकी डलर ३८ करोड बिक्री गरी रु.५३ अर्ब २४ करोड बराबरको भारतीय रूपैयाँ खरिद भएको छ । अघिल्लो वर्षको सोही अवधिमा अमेरिकी डलर ५६ करोड बिक्री गरी रु.७५ अर्ब ३९ करोडबराबरको भारतीय रूपैयाँ खरिद भएको थियो ।