एकै महिनामा भित्रिए १.२८ लाख पर्यटक, भारतबाट सबैभन्दा धेरै

काठमाण्डौ । नेपालमा एकै महिनामा १ लाख २८ हजार ४४३ जना पर्यटक भित्रिएका छन् । नेपाल पर्यटन बोर्डले सार्वजनिक गरेको तथ्याङ्कअनुसार अक्टोबर महिनामा पर्यटकको आवागमन उल्लेख बढेको देखिएको हो ।  

तथ्याङ्कअनुसार उक्त अवधिमा दक्षिण एशियाबाट २९ हजार ६०, एशियाका अन्य देशबाट २३ हजार १२७, यूरोपबाट ४० हजार ५००, ओसियाना छ हजार ८१४, अमेरिका १६ हजार ४०७, मध्यपूर्व तीन हजार ५४८, अफ्रिका ४४३ र अन्य देशबाट आठ हजार ४४४ पर्यटक नेपाल आएका छन् ।

अक्टोबरमा भारतबाट सबैभन्दा धेरै पर्यटक नेपाल आएका छन् । अक्टोबर महिनामा १७ हजार, २९८ जना भारतीय पर्यटक नेपाल आएका थिए ।  

यसैगरी अमेरिकाबाट १३ हजार २८६, बेलायतबाट आठ हजार ७१८, चीनबाट छ हजार ७५५, जर्मनीबाट छ हजार ३६६, अष्ट्रेलियाबाट ६ हजार १७७ जना,श्रीलङ्काबाट पाँच हजार ५३५, फ्रान्सबाट पाँच हजार ४५, बङ्गलादेशबाट चार हजार ६४१ र म्यानमारबाट तीन हजार ३८ पर्यटक नेपाल भ्रमणमा आएका थिए ।

जनवरीदेखि अक्टोबरसम्म भने कुल ९ लाख ४३ हजार ७१६ जना पर्यटक नेपाल भित्रिएका छन् । अक्टोबर महिनालाई पर्यटकीय गतिविधिका लागि मुख्य सिजनको रुपमा लिइन्छ ।