प्राधिकरणले ‘फास्ट ट्रयाक’ मार्फत २० अर्ब रुपैयाँको उर्जा ऋणपत्र जारी गर्ने, सेबोनमा आवेदन दिने तयारी

काठमाण्डौ । नेपाल विद्युत प्राधिकरणले ‘फास्ट ट्रयाक’ मार्फत २० अर्ब रुपैयाँबराबरको उर्जा ऋणपत्र जारी गर्ने प्रक्रिया अघि बढाएको छ । प्राधिकरणले विभिन्न चार वटा ठूला जलविद्युत आयोजना निर्माणका लागि वित्तीय स्रोत जुटाउन उर्जा ऋणपत्र जारी गर्ने तयारी गरेको हो ।  

प्राधिकरणले ऋणपत्र निष्कासनको अनुमतिका लागि नेपाल धितोपत्र बोर्ड(सेबोन(मा आवेदन दिने तयारी समेत गरेको छ । गत असोज २३ गते बसेको मन्त्रिपरिषद् बैठकले जलविद्युत आयोजना निर्माणका लागि स्रोत व्यवस्थापन गर्न २० अर्ब रुपैयाँबराबरको उर्जा ऋणपत्र चरणवद्ध रुपमा निष्कासन गर्न स्वीकृति प्रदान गर्ने निर्णय गरेको थियो ।  

ऋणपत्र निष्कासनबाट प्राप्त रकमले अपर अरुण जलविद्युत आयोजना(करिब ११ सय मेगावाट क्षमता),तामाकोशी–५जलविद्युत आयोजना(१ सय मेगावाट),चैनपुर सेती जलविद्युत अयोजना(२१० मेगावाट) र मोदी जलविद्युत आयोजना(४२ मेगावाट) निर्माण गरिनेछ । यी आयोजनाहरु प्राधिकरणमार्फत बन्नेछन् ।