प्रभू बैंकले निरज लम्साललाई बनायो कामू सीईओ

काठमाण्डौ । प्रभू बैंक लिमीटेडले निमित्त प्रमुख कार्यकारी अधिकृत(सीईओ)को रुपमा निरज लम्साललाई नियुक्त गरेको छ ।  

बैंकका प्रमुख कार्यकारी अधिकृत अशोक शेरचन र नायव प्रमुख कार्यकारी अधिकृत मणिराम पोखरेल पक्राउ परेपछि दैनिक कार्यसम्पादनको मुख्य जिम्मेवारीसहित सोही बैंकमा उपलब्ध सबैभन्दा सिनियर कर्मचारीको रुपमा लम्सालले कामू सीईओको जिम्मेवारी पाएका हुन् । 

बैंकको सञ्चालक समितिका अध्यक्ष किशोरजंग कार्कीले बिजशालासँग कुरा गर्दै आइतबार राति आकस्मिक रुपमा बसेको बैठकले लम्साललाई कामू दिने निर्णय गरेको पुष्टि गरे ।  

'सीईओ र डिसीईओ पक्राउपछि बैंकमा उहाँ(लम्साल) वरिष्ठ कर्मचारी हो । त्यसका कारण नियमित कामकाज सुचारु होस् र केही व्यक्ति पक्राउ पर्दैमा बैंकको काममा केही प्रभाव नपरोस् भन्ने उद्देश्यले उहाँलाई कामू दिइएको हो ।' उनले भने -'बैंकले उहाँलाई निमित्तको रुपमा गर्न सकिने बाहेकको विशेष अधिकार चाहिँ दिएको छैन । अर्को व्यवस्था नभएसम्मका लागि बैंकको नेतृत्व अब उहाँले नै गर्नुहुन्छ ।' 

अध्यक्ष कार्कीले बैंकका आम निक्षेपकर्ता, सेयरधनी, ग्राहकलाई ढुक्क रहन र बैंक पूर्ववतः अवस्थामै सञ्चालन हुनेमा विश्वस्त रहन समेत अपील गरेका छन् ।  

'सीआईबीको अनुसन्धान व्यक्तिगत अनुसन्धानको कुरा हो । यसले बैंकलाई केही पनि असर गर्दैन ।'- उनले थपे ।  

केही कर्मचारीले लम्साललाई कामू दिइएको विषयमा असन्तुष्टि जनाएपछि उनीहरुलाई समेत सम्बोधन गर्दै अध्यक्ष कार्कीले कुनै छनौट विधिबाट बैंकको नेतृत्वको जिम्मा नदिइएकोले अहिले नै नअत्तालिन आग्रह समेत गरे । बैंकको सेवा प्रवाहलाई अझ चुस्त र दुरुस्त बनाउने कार्यमा दत्तचित्त भएर लाग्न समेत उनले कर्मचारीलाई आग्रह गरेका छन् ।