विदेशमा परामर्श दिएर नेपालीले आर्जन गरे १८ अर्ब बढी

काठमाण्डौ । चालु आर्थिक वर्षको पहिलो पाँच महिनामा नेपालीहरूले विदेशमा परामर्श प्रदान गरेर उल्लेख्य रूपमा आम्दानी हासिल गरेका छन्। नेपाल राष्ट्र बैंकका तथ्यांकअनुसार, परामर्श, प्राविधिक, अनुसन्धान तथा श्रव्यदृश्य सेवामा आम्दानी बढ्दै गएको देखिन्छ।

यस अवधिमा नेपालीहरूले परामर्श सेवाबाट १८ अर्ब १० करोड रुपैयाँ आम्दानी गरेका छन्। त्यही समय नेपालबाट परामर्श सेवामा १ अर्ब ७९ करोड रुपैयाँ खर्च भएकोले, परामर्श सेवाबाट खुद आम्दानी १६ अर्ब ३१ करोड रुपैयाँ पुगेको छ। गत वर्षको सोही अवधिमा खुद आम्दानी १३ अर्ब २० करोड रुपैयाँ थियो।

नेपालले अनुसन्धान तथा विकास सेवाबाट ५ करोड ६५ लाख रुपैयाँ भित्र्याएको छ भने २ करोड ८३ लाख रुपैयाँ बाहिरिएको छ। नवप्रवर्तन र प्रविधि विकासको दृष्टिले महत्वपूर्ण मानिने यस क्षेत्रमा कारोबार अझै न्यून रहेको छ।

प्राविधिक र व्यवसायिक सेवाबाट ९ अर्ब ५५ करोड रुपैयाँ आम्दानी भएको छ। यस क्षेत्रमा खर्च ३ अर्ब ४३ करोड रुपैयाँ रहेकोले खुद आम्दानी ६ अर्ब १२ करोड रुपैयाँ पुगेको छ। गत वर्षको सोही अवधिमा आम्दानी ७ अर्ब ३९ करोड रुपैयाँ थियो।

श्रव्यदृश्य सेवाबाट नेपालीहरूले १ अर्ब ५८ करोड रुपैयाँ आम्दानी गरेका छन्। सो सेवामा ४५ करोड १३ लाख रुपैयाँ खर्च भएकोले खुद आम्दानी १ अर्ब १३ करोड रुपैयाँ पुगेको छ।