वाणिज्य विभागले गर्यो १८ फर्ममाथि अनुगमन, न्यु शिव स्टोरलाई २ लाख जरिवाना

काठमाण्डौ । वाणिज्य, आपूर्ति तथा उपभोक्ता संरक्षण विभागले बिहीबार काठमाण्डौ उपत्यकाका १८ व्यावसायिक फर्ममाथि अनुगमन गरी कारबाही तथा निर्देशन जारी गर्दै बजार अनुशासन कायम गर्न सक्रियता बढाएको छ।

उपभोक्ता संरक्षण ऐन २०७५ र नियमावली २०७६ को कार्यान्वयनका क्रममा विभागले विभिन्न स्थानमा निरीक्षण गर्दा कानुनी प्रावधान उल्लङ्घन गरेको पाइएका फर्मलाई जरिबाना र सुधारात्मक निर्देशन दिएको जनाएको छ।

अनुगमनका क्रममा काठमाण्डौ महानगरपालिका–२९, नयाँ बसपार्कमा सञ्चालनमा रहेको ‘न्यु शिव स्टोर’ लाई २ लाख १ हजार रुपैयाँ जरिबाना गरिएको छ। विभागका अनुसार फर्मले उपभोक्ता संरक्षणसम्बन्धी मापदण्ड पूरा नगरेको पाइएको थियो।

यसैगरी ललितपुरको गोदावरी नगरपालिका–१ मा रहेको ‘हिमालयन ब्रुअरी प्रालि’ लाई व्यवसायसँग सम्बन्धित आवश्यक कागजातसहित तीन दिनभित्र विभागमा उपस्थित हुन निर्देशन दिइएको छ। यसलाई नियामक निकायले उद्योगहरूको कागजात व्यवस्थापन र पारदर्शितामा जोड दिएको संकेतका रूपमा हेरिएको छ।

विभागको टोलीले काठमाण्डौ, ललितपुर र भक्तपुरका विभिन्न स्थानमा रहेका अन्य १६ फर्मको समेत निरीक्षण गरेको थियो। न्यु लुजा मदिरा स्टोर, न्यु सिर्जना ट्रेडर्स, प्रनित सेल्स एन्ड मार्केटिङ, वरुण बेभरेज, दिव्यज्योति स्टोर, केएन्डपी अल्कोहलिक स्टोर र इन्द्रकमल लिकर सपलगायत फर्मलाई तत्काल सुधार गर्नुपर्ने विषयमा सामान्य निर्देशन दिइएको विभागले जनाएको छ।

नियमित अनुगमनमार्फत उपभोक्तालाई ठगीबाट जोगाउने, व्यवसायलाई उत्तरदायी बनाउने र स्वस्थ प्रतिस्पर्धा प्रवर्द्धन गर्ने उद्देश्य रहेको जनाउँदै विभागले आगामी दिनमा बजार अनुगमन अझ प्रभावकारी र निरन्तर बनाइने स्पष्ट पारेको छ।