कालिञ्चोक दर्शनको आम्दानीमा ३६८% को उछाल, घाटाबाट बाहिरिँदै १.१९ करोड नाफा आर्जन

काठमाण्डौ । कालिञ्चोक दर्शन लिमिटेडले चालु आवको दोस्रो त्रैमासको अपरिष्कृत वित्तीय विवरण सार्वजनिक गरेको छ । जसअनुसार कम्पनीले १ करोड १९ लाख रुपैयाँबराबरको खुद नाफा आर्जन गरेको छ । अघिल्लो आवको सोही अवधिसम्म भने कम्पनी ३३ लाख ८६ हजार रुपैयाँ घाटामा थियो ।

कम्पनीको आम्दानी उल्लेख्य वृद्धि भएसँगै कम्पनीले नाफा आर्जन गर्न सफल भएको हो । यो अवधिका कम्पनीको आम्दानी पनि ३६८.७५ प्रतिशतले बढेको छ । कम्पनीले समीक्षा अवधिमा ३ करोड ४१ लाख रुपैयाँबराबरको कुल आम्दानी गरेको छ ।

यस्तै कम्पनीले ५ लाख ३५ हजार रुपैयाँबराबरको अन्य आम्दानी गरेको छ । यो अवधिमा कम्पनीको वित्त खर्च बढेको छ । अघिल्लो आवमा १६ लाख ३४ हजार रहेको कम्पनीको वित्त खर्च बढेर २९ लाख ५५ हजार पुगेको छ ।

यो अवधिमा कम्पनीको रिजर्भ पनि बढेर ४ करोड ३९ लाख पुगेको छ । अघिल्लो आव कम्पनीको रिजर्भ २ करोड ८५ लाख रुपैयाँ थियो ।

समीक्षा अवधिसम्म कम्पनीको प्रतिसेयर आम्दानी(ईपीएस) ३.९७ रुपैयाँ, प्रतिसेयर नेटवर्थ १०७.३६, प्रतिसेयर कुल सम्पत्तिको मूल्य १३०.६३, मूल्य आम्दानी अनुपात १९७.७७ गुणा र तरलता अनुपात ०.९८ प्रतिशत कायम भएकोृ छ ।