शिवम् सिमेन्टको नाफामा ५२८% को उछाल, २०% ले घट्यो खर्च

काठमाण्डौ । खर्च नियन्त्रणमा प्राप्त भएको सफलताका कारण शिवम् सिमेन्टको नाफामा आकर्षक वृद्धि देखिएको छ । कम्पनीले सार्वजनिक गरेको चालु आवको दोस्रो त्रैमासम्मको अपरिष्कृत वित्तीय विवरणअनुसार कम्पनीले चालु आवको दोस्रो त्रैमाससम्म ३५ करोड ७० लाख रुपैयाँबराबरको खुद नाफा आर्जन गरेको छ ।

यो रकम अघिल्लो आवको सोही अवधिको तुलनामा ५२८.५२ प्रतिशतले बढी हो । अघिल्लो आवको सोही अवधिसम्म भने कम्पनीले ५ करोड ६८ लाख रुपैयाँबराबरको खुद नाफा आर्जन गरेको थियो ।

कम्पनीको बिक्री आम्दानी भने केही घटेको छ । अघिल्लो आवमा ३ अर्ब १० करोड रुपैयाँ रहेको कम्पनीको बिक्री आम्दानी घटेर ३ अर्ब ९ करोड रुपैयाँमा सीमित बनेको छ । बिक्री आम्दानीमा कस्ट अफ सेल्स घटाउदा भने कम्पनीको ग्रस प्रफिट भने बढेको छ । अघिल्लो आवमा ४० करोड १ लाख रहेको कम्पनीको ग्रस प्रफिट बढेर ६५ करोड ४४ लाख पुगेको छ ।

कम्पनीले यो अवधिमा १० करोड ८२ लाख रुपैयाँबराबरको अन्य आम्दानी गरेको छ ।

यसैगरी कम्पनीले २०.११ प्रतिशतले खर्च घटाएको छ । कम्पनीको खर्च ४४ करोड ६४ लाखबाट घटेर ३५ करोड ६६ लाखमा सीमित बनेको छ । कम्पनीको रिजर्भको आकार पनि ३ अर्ब १५ करोड रुपैयाँबाट बढेर ३ अर्ब ५३ करोड पुगेको छ ।

कम्पनीको कुल चालु सम्पत्ति ४ अर्ब ३२ करोड र कुल चालु दायित्व २ अर्ब ८४ करोड रुपैयाँ रहेको छ ।

समीक्षा अवधिसम्म कम्पनीको प्रतिसेयर आम्दानी १२.७७ रुपैयाँ, प्रतिसेयर नेटवर्थ १८०.३८ रुपैयाँ, प्रतिसेयर कुल सम्पत्तिको मूल्य २३५.१० रुपैयाँ र तरलता अनुपात १.५२ प्रतिशत कायम भएको छ ।