केही खाडी देशका लागि पुनः श्रम स्वीकृति खुला, श्रमिकलाई राहत

काठमाण्डौ । श्रम, रोजगार तथा सामाजिक सुरक्षा मन्त्रालयले मध्यपूर्वका केही देशका लागि पुनः श्रम स्वीकृति दिने निर्णय गरेको छ। यस निर्णयसँगै साउदी अरेबिया, संयुक्त अरब इमिरेट्स (यूएई), कतार, ओमान, यमन, जोर्डन र टर्कीमा कार्यरत नेपाली कामदारहरू पुनः काममा फर्किन सक्ने भएका छन्।

यसअघि क्षेत्रीय द्वन्द्व र सुरक्षाजन्य चुनौती बढेको भन्दै सरकारले फागुन १७ गतेदेखि ती गन्तव्यमा श्रम स्वीकृति र नवीकरण प्रक्रिया अस्थायी रूपमा रोकेको थियो। त्यसले गर्दा विदेश फर्कन नपाएका श्रमिकहरू समस्यामा परेका थिए।

अब भने परिस्थितिको पुनः मूल्यांकनपछि जोखिम कम भएका देशहरूलाई प्राथमिकतामा राख्दै पुनः श्रम स्वीकृति मात्र खुला गर्ने निर्णय गरिएको मन्त्रालयले जनाएको छ।

मन्त्रालयका अनुसार, यसअघि इरान, इजरायल, बहराइन, कुवेत, इराक र लेबनानलगायत देशमा पनि श्रम स्वीकृति र नवीकरण रोकिएको थियो। ती देशहरूमा कार्यरत वा बिदामा नेपाल आएका श्रमिकहरूलाई समेत आवश्यकता अनुसार पुनः स्वीकृति दिने व्यवस्था गरिएको छ।

मन्त्रालयका प्रवक्ता पिताम्बर घिमिरेका अनुसार, सम्बन्धित देशस्थित नेपाली नियोग तथा अन्य सरोकारवाला निकायबाट आएको माग, साथै परराष्ट्र मन्त्रालय र वैदेशिक रोजगार विभागको सिफारिसका आधारमा यो निर्णय गरिएको हो।

सरकारले श्रमिकको सुरक्षा अवस्थालाई मुख्य प्राथमिकता दिँदै आगामी दिनमा पनि अवस्था हेरेर यस्ता निर्णयहरू क्रमशः परिमार्जन गर्दै जाने संकेत दिएको छ।