एनआइसी एशिया क्यापिटलका म्युचुअल फण्डहरुको वित्तीय अवस्थामा सुधार, सेयरबजारमा सबैको लगानी वृद्धि

काठमाण्डौ । एनआइसी एशिया क्यापिटल लिमिटेडका म्युचुअल फण्डहरुको वित्तीय अवस्थामा उल्लेख्य सुधार देखिएको छ ।  

हाल क्यापिटलका दुई खुलामुखी र ४ बन्दमुखी योजना गरी ६ वटा म्युचुअल फण्ड सञ्चालनमा छन् । खुलामुखी योजनाहरुमा एनआइसी एशिया इक्विटी लिङ्क्ड इन्भेष्टमेन्ट स्किम र एनआइसी एशिया डायनामिक डेब्ट फण्ड छन् भने बन्दमुखी योजनाहरुमा ब्यालेन्स्ड फण्ड, फ्लेक्सी क्याप फण्ड, ग्रोथ फण्ड–२ र एनआइसी एशिया सेलेक्ट–३० रहेका छन् ।  

फागुन मसान्तसम्ममा यी फण्डहरुको वित्तीय प्रदेर्शनमा उल्लेखनीय सुधार देखिएको छ । पछिल्लो समय सेयरबजारमा क्रमिक सुधार देखिएसँगै एनआइसी एशिया क्यापिटलका फण्डहरुको नाफा, प्रतिइकाई खुद सम्पत्ति मूल्य (न्याभ) र लगानीको भ्यालुमा सुधार देखिएको हो ।  

फागुन महिनामा ६ वटै फण्डको सेयरबजारमा गरिएको लगानी उल्लेख्य बढेको छ भने न्याभ र मुनाफामा पनि सुधार देखिएको छ ।  

एनआइसी एशिया इक्विटी लिंक्ड इन्भेष्टमेन्ट स्किम  

यो फण्डले फागुन महिनामा १ करोड ६१ लाख ४९ हजार रुपैयाँ नाफा कमाएको छ । अघिल्लो महिना अर्थात् माघमा यो फण्डले ९७ लाख ३७ हजार रुपैयाँ घाटा व्यहोरेको थियो ।  

त्यस्तै, फण्डको सेयरबजारमा लगानी समेत १६.२५ प्रतिशतले बढेको छ । फागुनमा यो फण्डको लगानी ५३ करोड ९० लाख २५ हजार पुगेको छ । माघमा भने यस्तो लगानी ४६ करोड ३६ लाख ९५ हजार रुपैयाँ थियो ।

साथै फण्डको न्याभमा पनि सुधार देखिएको छ । फागुनमा यो फण्डको न्याभ बढेर १०.२२ रुपैयाँ पुगेको छ । माघमा भने ९.८९ रुपैयाँ थियो ।  

एनआइसी एशिया डायनामिक डेब्ट फण्ड  

यो फण्डको पनि न्याभ, मुनाफा र लगानीको आकार सबै बढेको छ । लगानीको आकार ११.३८ प्रतिशतले बढेर फागुनमा १ अर्ब ६ करोड ९२ लाख पुगेको छ । अघिल्लो महिना सेयरबजारमा लगानी ९५ करोड ९९ लाख ६९ हजार रुपैयाँ थियो ।  

त्यस्तै, १ करोड ६० लाख ९८ हजार रुपैयाँ घाटा व्यहोरेको यो फण्डले फागुनमा ४ करोड ४३ लाख १० हजार रुपैयाँ नाफा कमाएको छ ।  

साथै फण्डको न्याभ पनि ९.८५ रुपैयाँबाट बढेर १०.२१ रुपैयाँ पुगेको छ ।  

एनआइसी एशिया ब्यालेन्स्ड फण्ड

एनआइसी एशिया ब्यालेन्स्ड फण्डले पनि सेयरबजारमा लगानी १२.२९ प्रतिशतले बढाएको छ । माघमा ४४ करोड ८२ लाख रुपैयाँ सेयरबजारमा लगानी गरेकोमा फागुनमा ५० करोड ३३ लाख पुर्याएको छ ।  

साथै यो फण्डको नाफा पनि १३२६.८९ प्रतिशतले बढेको छ । माघमा २४ लाख ५८ हजार रुपैयाँ मात्रै नाफा कमाएको यो फण्डले फागुनमा ३ करोड ५० लाख रुपैयाँ नाफा कमाउन सफल भएको छ ।  

साथै न्याभ पनि १०.०३ रुपैयाँबाट बढेर १०.४७ रुपैयाँ पुगेको छ ।  

 

एनआइसी एशिया फ्लेक्सी क्याप फण्ड

एनआइसी एशिया फ्लेक्सी क्याप फण्डको सेयरबजारमा लगानी ५.४८ प्रतिशतले बढेको छ । माघमा यो क्षेत्रमा ७६ करोड २ लाख रुपैयाँ लगानी रहेकोमा फागुनमा बढेर ८० कराड १८ लाख रुपैयाँ पुगेको छ ।  

त्यस्तै, फण्डको मुनाफा पनि ४९९.४८ प्रतिशतले बढेर फागुनमा ५ करोड २८ लाख ४९ हजार रुपैयाँ पुगेको छ । माघमा यो फण्डले जम्मा ८८ लाख १३ हजार रुपैयाँ मात्रै नाफा कमाएको थियो ।  

त्यस्तै, न्याभ पनि १०.०९ रुपैयाँबाट बढेर १०.५२ रुपैयाँ पुगेको छ ।  

एनआइसी एशिया ग्रोथ फण्ड–२

यो फण्डले पनि सबै सूचकहरुमा उल्लेख्य प्रदर्शन गरेको छ । फण्डले सेयरबजारमा लगानी १५.४८ प्रतिशतले बढाएर ८६ करोड ९० लाख रुपैयाँ पुर्याएको छ । माघ महिनामा भने सेयरबजारमा लगानी ७५ करोड २५ लाख रुपैयाँ रहेको थियो ।  

त्यस्तै, माघमा १ करोड ९७ लाख ८० हजार रुपैयाँ घाटा व्यहोरेको यो फण्डले फागुनमा भने २ करोड ७२ लाख रुपैयाँ नाफा कमाउन सफल भएको छ ।  

फण्डको न्याभ पनि १०.१५ रुपैयाँबाट बढेर १०.६७ रुपैयाँ पुगेको छ ।  

एनआइसी एशिया सेलेक्ट–३०  

अन्य फण्डहरुले जस्तै एनआइसी एशिया सेलेक्ट–३० ले पनि सबै सूचकहरुमा सुधार गरेको छ ।  

फण्डले सेयरबजारमा १ अर्ब ७ करोड ९८ लाख रुपैयाँ लगानी गरेको छ । यो लगानी रकम अघिल्लो महिनाको तुलनामा ४.७६ प्रतिशत बढी हो । माघमा फण्डले सेयरबजारमा १ अर्ब ३ करोड ८ लाख रुपैयाँ लगानी गरेको थियो ।  

त्यस्तै, माघमा ५ करोड ८९ लाख रुपैयाँ घाटा ब्यहोरेको यो फण्डले फागुन महिनामा भने ४६ लाख ९७ हजार रुपैयाँ नाफा कमाउन सफल भएको छ । फण्डको न्याभ पनि ९.५३ रुपैयाँबाट बढेर १०.०४ रुपैयाँ पुगेको छ ।