इन्धनको मूल्यवृद्धिपछि हवाई भाडा बढाउने निर्णय

काठमाण्डौ । पश्चिम एसियामा जारी द्वन्द्वका कारण अन्तर्राष्ट्रिय बजारमा इन्धनको मूल्य अत्यधिक बढेपछि नेपालमा पनि हवाई इन्धनको मूल्य मंगलबार रातिदेखि दोब्बरजति वृद्धि गरिएको छ ।

नेपाल आयल निगमले चैत १८ गते रातिदेखि लागू हुने गरी आन्तरिक उडानका लागि हवाई इन्धनको मूल्य प्रतिलिटर १२४ रुपैयाँले बढाएको जनाएको छ । यसर्थ अब हवाई इन्धनको मूल्य प्रतिलिटर २५१ रुपैयाँ पुगेको छ ।

इन्धनको मूल्य दोब्बर बढेपछि वायुसेवा सञ्चालकहरूले आफ्नो उडान खर्च सम्हाल्न हवाई भाडा बढाउने निर्णय गरेका छन् । नेपाल वायुसेवा सचालक संघका अनुसार यो वृद्धि सबै आन्तरिक र बाह्य गन्तव्यका उडान तथा हेलिकप्टर सेवा भाडामा पनि लागू हुनेछ ।  

संघका अनुसार हवाई इन्धनको मूल्य बढ्दा वा घट्दा भाडा दर स्वतः समायोजन हुने पूर्वसहमति र स्वचालित प्रणाली अनुसार यो वृद्धि गरिएको हो । इन्धन मूल्य अस्वाभाविक रूपमा बढेपछि भाडा वृद्धि गर्नु परेको उल्लेख गर्दै संघले यात्रुहरूमा परेको असुविधाप्रति क्षमायाचना पनि गरेको छ ।

विज्ञप्तिमा भनिएको छ, ‘यात्रु महानुभावहरूलाई सहज, सरल र सुविधाजनक सेवा उपलब्ध गराउन हवाई र हेलिकप्टर भाडा दर स्वतः वृद्धि गर्नुपर्ने भएकाले नयाँ भाडा दर लागू गरिएको हो । यो भाडा दर नेपाल आयल निगमले तोकेको मिति २०८२ चैत १८ देखि लागू हुनेछ ।’