वैशाख ५ गतेदेखि प्रत्येक शनिबार असनमा सवारी साधन प्रवेश निषेध

काठमाडौंको असन क्षेत्रको मौलिकता जोगाउने उद्देश्यले वैशाख ५ गतेदेखि हरेक शनिबार सवारी साधन प्रवेशमा रोक लगाइ सामाजिक, सांस्कृतिक तथा व्यापारिक गतिविधि बढाउने निर्णय गरिएको छ।

यसअघि स्थानीय संघसंस्था, क्लब र समुदायले चैत २८ गतेदेखि कार्यक्रम सुरु गर्ने तयारी गरेका थिए। तर काठमाडौं महानगरपालिकाकी कार्यवाहक प्रमुख सुनिता डंगोलको अध्यक्षतामा बसेको बैठकले तयारीमा कमी नआओस् भनेर कार्यक्रम एक सातापछि सार्दै वैशाख ५ गतेदेखि कार्यान्वयन गर्ने निर्णय गरेको हो। बैठकमा प्रमुख प्रशासकीय अधिकृत सरोज गुरागाईं, वडाध्यक्ष योगेश खड्गी, प्रशासन विभाग प्रमुख महेश काफ्ले लगायत सरोकारवाला निकायका प्रतिनिधिहरू सहभागी थिए।

बैठकमा डंगोलले असनलाई धार्मिक र सामाजिक कार्यका लागि महत्वपूर्ण स्थान भएको उल्लेख गर्दै यसको ऐतिहासिक र सांस्कृतिक महत्त्व संरक्षण गर्नु सबैको दायित्व भएको बताइन्। 

उनले वडा कार्यालयको नेतृत्वमा सरोकारवालाहरूको सहभागिता र स्थानीयको अपनत्वसहित कार्यक्रम सुरु गरी त्यसलाई दीगो बनाउनुपर्नेमा जोड दिइन्। साथै, स्थानीयबासीको सहजता र सुरक्षालाई प्राथमिकतामा राखेर कार्यक्रम सञ्चालन गरिने उनले स्पष्ट पारिन्।

वडाध्यक्ष योगेशकुमार खड्गीका अनुसार स्थानीय, संघसंस्था र समुदायको सहकार्यमा कार्यक्रम अघि बढाइएको हो। उनले यसले असन बजारको मौलिकता जोगाउनुका साथै वायु प्रदूषण नियन्त्रण र सहरी वातावरण सुधारमा पनि सहयोग पुग्ने बताए।