महेश बस्नेतकी श्रीमतीसहित १० जनाविरुद्ध ज्यान मार्ने मुद्दा

काठमाण्डौं । माइतीघर मण्डलामा धर्नामा रहेकी शोभा पाठकमाथि भएको आक्रमण प्रकरणमा ज्यान मार्ने उद्योगको अभियोगमा १० जनाविरुद्ध मुद्दा दायर गरिएको छ ।

जिल्ला प्रहरी परिसर काठमाडौँको अनुसन्धान प्रतिवेदनका आधारमा जिल्ला सरकारी वकिल कार्यालय काठमाडौँले मंगलबार जिल्ला अदालत काठमाडौँमा उक्त मुद्दा दर्ता गरेको हो । 

अभियोगपत्रमा महेश बस्नेतकी पत्नी अम्बिका भण्डारी (बस्नेत) सहित १० जनालाई प्रतिवादी बनाइएको छ ।

सरकारी वकिल कार्यालयका अनुसार मुलुकी अपराध संहिता, २०७४ को दफा १८३ अनुसार ज्यान मार्ने उद्योगको कसुरमा मुद्दा अघि बढाइएको हो ।

घटनापछि सार्वजनिक भएको विवरणअनुसार गत वैशाख १४ गते माइतीघर मण्डलामा आमरण अनसनमा बसेकी जानुका पाठक (शोभा पाठक)माथि समूहगत रूपमा आक्रमण भएको थियो ।  

सो आक्रमणका क्रममा उनी घाइते भएकी थिइन् । प्रहरीका अनुसार व्यक्तिगत आरोप–प्रत्यारोप र चरित्र हत्यासम्बन्धी विवाद चर्किँदै जाँदा घटना भएको देखिएको छ ।

घटनापछि प्रहरीले संलग्न भनिएका व्यक्तिहरूलाई नियन्त्रणमा लिएको थियो । हाल मुद्दा अदालतमा पुगेसँगै घटनाको कानूनी प्रक्रिया अघि बढेको छ ।