सिन्धुलीमा जन्ती सवार बोलेरो दुर्घटना: पाँच घाइते, बेहुला सुरक्षित

काठमाण्डौं । बेहुलासहित जन्ती लिएर उदयपुरतर्फ जाँदै गरेको मधेश प्रदेश ०३–००१ च ८२०२ नम्बरको डबल क्याब बोलेरो दुधौली नगरपालिका–१ राँगेस्थित घुम्ती सडकमा अनियन्त्रित भई दुर्घटनामा बिहीबार बिहान जन्ती बोकेको बोलेरो दुर्घटना हुँदा पाँच जना घाइते भएका छन्।

दुर्घटनामा योगबहादुर खत्री गम्भीर घाइते भएका छन्। उनलाई प्रारम्भिक उपचारपछि थप उपचारका लागि सिन्धुली अस्पताल पठाइएको छ।

अन्य घाइतेहरू लालबहादुर विक, साने विक, श्याम विकलगायत चार जनाको उपचार सिर्थौली अस्पतालमा भइरहेको छ।

फिक्कल गाउँपालिका–१ महादेवडाँडा जलजलेबाट उदयपुरको घाइघाट–रातमाटेतर्फ बेहुला हेमबहादुर विकसहित जन्ती बोकेर जाँदै गरेको सवारी साधन अचानक नियन्त्रण गुमाउँदा दुर्घटना भएको प्रहरीले जनाएको छ। 

गाडीमा कुल १० जना सवार थिए। दुर्घटनामा बेहुला भने सकुशल रहेका छन्।

प्रहरीले दुर्घटनाको कारणबारे अनुसन्धान सुरु गरेको जनाएको छ। प्रारम्भिक अनुमानअनुसार तीव्र गति र घुम्ती सडकका कारण सवारी साधन अनियन्त्रित भएको हुनसक्ने बताइएको छ।