स्मार्ट टेलिकम प्रकरणमा एनआईएमबीको स्पष्टिकरणः ‘निक्षेपकर्ताको हित जोगाउन कर्जा असुली प्रक्रिया अघि बढायौं’

काठमाण्डौ । नेपाल इन्भेष्टमेन्ट मेगा बैंक(एनआईएमबी)ले आफ्ना प्रमुख कार्यकारी अधिकृत (सीईओ) ज्योतिप्रकाश पाण्डेसँग सम्बन्धित विषयमा सार्वजनिक रूपमा उठेका प्रश्नबारे स्पष्टिकरण दिँदै सम्पूर्ण प्रक्रिया कानूनी दायराभित्रै सम्पन्न भएको जनाएको छ ।  

बैंकले बुधबार जारी गरेको प्रेस विज्ञप्तिमार्फत स्मार्ट टेलिकमसँग सम्बन्धित कर्जा असुली, सम्पत्ति लिलामी तथा भुक्तानी व्यवस्थापनका सम्पूर्ण काम प्रचलित कानून, नियामकीय व्यवस्था र कर्जा असुली निर्देशिकाअनुसार गरिएको दाबी गरेको हो ।

बैंकका अनुसार नेपाल प्रहरीको केन्द्रीय अनुसन्धान ब्यूरो (सीआईबी) ले स्मार्ट टेलिकमसँग सम्बन्धित केही विषयमा अनुसन्धान गरिरहेको छ र सोही क्रममा सीईओ पाण्डेसँग बयान तथा आवश्यक सोधपुछ प्रक्रिया अघि बढाइएको हो । बैंकले यसलाई अनुसन्धान निकायलाई गरिरहेको नियमित सहयोगको हिस्सा भएको बताएको छ ।

एनआईएमबीले बैंक तथा वित्तीय संस्था सम्बन्धी ऐन, सुरक्षित कारोबार ऐन र नेपाल राष्ट्र बैंकको कर्जा असुली निर्देशिकाअनुसार निक्षेपकर्ताको रकम सुरक्षित गर्नु आफ्नो प्रमुख दायित्व भएकाले सोहीअनुसार कर्जा असुली प्रक्रिया अघि बढाइएको स्पष्ट पारेको छ । बैंकले अनुसन्धानका लागि माग गरिएका सम्पूर्ण कागजात, विवरण तथा आवश्यक सहयोग समयमै उपलब्ध गराउँदै आएको र आगामी दिनमा पनि पूर्ण सहकार्य रहने प्रतिबद्धता जनाएको छ ।

बैंकले २०८२ असोज ३ गते स्मार्ट टेलिकमसँग सम्बन्धित उपकरण तथा सामग्री लिलामी बिक्रीको सूचना प्रकाशित गरी नियमानुसार प्रक्रिया पूरा गरेको जनाएको छ । उक्त लिलामीबाट प्राप्त कुल ४ अर्ब ६० करोड रुपैयाँमध्ये ४ अर्ब २२ करोड रुपैयाँ सहवित्तीयकरण कर्जाको भुक्तानीमा प्रयोग गरिएको बैंकको भनाइ छ ।

बाँकी रहेको ३८ करोड रुपैयाँ भने सम्बन्धित दायित्व व्यवस्थापनका लागि ‘अर्नेस्ट मनी अक्सन अकाउन्ट’ मा सुरक्षित राखिएको बैंकले जनाएको छ । दूरसञ्चार उपकरण जडान भएका घरधनीको घरभाडा, विद्युत महसुल लगायतका भुक्तानी प्रमाणसहित माग आएपछि क्रमिक रूपमा भुक्तानी गरिने बैंकले स्पष्ट पारेको छ ।

बैंकले यस घटनाले आफ्नो दैनिक कारोबार, वित्तीय सुशासन, निक्षेपकर्ताको हित तथा ग्राहक सेवामा कुनै असर नपर्ने दाबी गर्दै सम्पूर्ण निक्षेपकर्ता, ग्राहक, शेयरधनी तथा सरोकारवालालाई ढुक्क रहन आग्रह गरेको छ । साथै, नेपाल राष्ट्र बैंकसहित नियामक निकायबाट प्राप्त निरन्तर सहयोग, विश्वास र सद्भावप्रति आभार व्यक्त गरेको छ ।