देशभर पश्चिमी न्यूनचापीय प्रणालीको प्रभाव, देशभर वर्षा र हिमपातको सम्भावना

काठमाण्डौं ।  जल तथा मौसम पूर्वानुमान महाशाखाले देशभर हाल पश्चिमी न्यूनचापीय प्रणाली, स्थानीय वायु तथा तल्लो वायुमण्डलमा विकसित न्यून चापीय क्षेत्रको संयुक्त प्रभाव कायम रहेको जनाएको छ ।

यी मौसमी प्रणालीहरूको असरका कारण देशका अधिकांश भू-भागमा बदलीसँगै वर्षा र हिमपातको सम्भावना बढेको महाशाखाले जनाएको हो ।

महाशाखाका अनुसार हाल कोशी, मधेश, बागमती, गण्डकी र लुम्बिनी प्रदेशसहित देशका अधिकांश हिमाली तथा पहाडी भू-भागमा सामान्य बदली रहेको छ ।

अन्य भू-भागमा भने आंशिक बदलीको अवस्था देखिएको छ । मौसम प्रणाली सक्रिय रहेकाले केही प्रदेशमा वर्षा जारी रहेको तथा केही स्थानमा मौसम क्रमशः बिग्रिँदै गएको जनाइएको छ ।

हाल कोशी र बागमती प्रदेशका केही स्थानका साथै लुम्बिनी र गण्डकी प्रदेशका केही क्षेत्रमा मध्यम वर्षा भइरहेको महाशाखाले जनाएको छ ।

मौसमीय गतिविधि सक्रिय रहेकाले आज दिनभर नै बदली र वर्षाको क्रम जारी रहने अनुमान गरिएको छ ।

दिउँसोको पूर्वानुमानअनुसार कोशी, बागमती र गण्डकी प्रदेशलगायत देशका हिमाली तथा पहाडी भू-भागमा सामान्य बदली रहनेछ भने अन्य क्षेत्रमा आंशिक बदली रहनेछ ।

मौसमी प्रणालीको प्रभावका कारण हिमाली क्षेत्रमा हिमपात र पहाडी तथा तराई क्षेत्रमा वर्षाको सम्भावना समेत उच्च रहेको महाशाखाले जनाएको छ ।

कोशी प्रदेशका केही स्थानसहित बागमती र गण्डकी प्रदेशका हिमाली तथा पहाडी भू-भागका केही क्षेत्र, अन्य हिमाली तथा पहाडी भू-भागका एक/दुई स्थान तथा मधेश, बागमती, गण्डकी र लुम्बिनी प्रदेशका तराई भू-भागका केही स्थानमा मेघगर्जन र चट्याङसहित मध्यम वर्षा तथा हिमपात हुन सक्ने पूर्वानुमान गरिएको छ ।

त्यसैगरी, आज राति पनि देशका धेरै भू-भागमा बदली कायम रहनेछ । कोशी, मधेश, बागमती र गण्डकी प्रदेशलगायत हिमाली भू-भागमा सामान्य बदली रहनेछ भने बाँकी क्षेत्रमा आंशिक बदली रहने अनुमान गरिएको छ ।

रातिको समयमा पनि मौसम अस्थिर रहने सम्भावना रहेको महाशाखाले जनाएको छ ।

रातिको पूर्वानुमानअनुसार कोशी र मधेश प्रदेशका केही स्थान, बागमती र गण्डकी प्रदेशका हिमाली तथा पहाडी भू-भाग तथा कर्णाली प्रदेशका हिमाली क्षेत्रका एक/दुई स्थानमा मेघगर्जन र चट्याङसहित मध्यम वर्षा तथा हिमपात हुन सक्ने सम्भावना रहेको महाशाखाले जनाएको छ ।