भीषण गर्मीका बीच फ्रान्सका सार्वजनिक स्थानमा मदिरा पिउन र बिक्री गर्न प्रतिबन्ध

काठमाण्डौ । फ्रान्सको राजधानी पेरिसमा चर्किएको भीषण गर्मीका कारण अस्पतालहरूमा बढ्दो दबाबलाई कम गर्न प्रशासनले सार्वजनिक स्थानमा मदिरा सेवन तथा बिक्रीमा अस्थायी प्रतिबन्ध लगाएको छ। प्रशासनको आदेशअनुसार केही निश्चित समयावधिमा सार्वजनिक स्थानमा मदिरा सेवन निषेध रहनेछ भने टेकअवे  मदिरा बिक्रीमा पनि सीमित घण्टाका लागि रोक लगाइनेछ। यद्यपि लाइसेन्स प्राप्त बार र रेस्टुरेन्टहरू यो प्रतिबन्धबाट बाहिर रहनेछन्।

फ्रान्सका प्रधानमन्त्री सेबास्टीयन लेकोरनुले देशभर उच्चतम स्तरको स्वास्थ्य सतर्कता जारी गरिएको जनाउँदै अस्पतालहरूमा अतिरिक्त स्वास्थ्यकर्मी परिचालन गर्ने र जोखिममा रहेका समूहको सुरक्षालाई प्राथमिकतामा राखिने बताएका छन्। उनका अनुसार असामान्य रूपमा बढेको तापक्रमका कारण स्वास्थ्य प्रणालीमा पर्ने दबाब व्यवस्थापन गर्न आपतकालीन तयारी आवश्यक भएको हो।

यसैबीच, स्पेन बेलायत र फ्रान्समा केही दिनदेखि जारी रहेको हीटवेभ अब पूर्वी युरोपतर्फ सर्दै गएको छ। जर्मनी र चेक गणतन्त्रका मौसम विभागहरूले पनि भीषण गर्मीको चेतावनी जारी गरेका छन्। जर्मनीमा तापक्रम ४० डिग्री सेल्सियससम्म पुग्न सक्ने अनुमान गरिएको छ भने चेक गणराज्यका अधिकांश क्षेत्रमा अत्यधिक गर्मीको जोखिम कायम रहेको जनाइएको छ।