विश्वकप २०२६ः क्यानडालाई हराउँदै मोरक्को बन्यो क्वार्टरफाइनलमा पुग्ने पहिलो टोली

काठमाण्डौ । मोरक्कोले सह–आयोजक क्यानडामाथि ३–० को प्रभावशाली जित निकाल्दै फिफा विश्वकप २०२६ को क्वार्टरफाइनलमा स्थान बनाउने पहिलो टोली बनेको छ। अन्तिम १६ अन्तर्गत भएको खेलमा दोस्रो हाफमा उत्कृष्ट प्रदर्शन गर्दै मोरक्कोले लगातार १० खेलको अपराजित यात्रालाई पनि कायम राख्यो।

घरेलु समर्थकको साथ पाएको क्यानडाले पहिलो हाफमा आक्रामक सुरुआत गरेको थियो। खेलको सुरुआती १५ मिनेटभित्र तानी ओलुवासेयीले उत्कृष्ट अवसर सिर्जना गरे पनि मोरक्कोका गोलरक्षक यासिन बोनुले शानदार बचाउ गर्दै टोलीलाई संकटबाट जोगाए। त्यसपछि एलिस्टर जोनस्टनको हेडर पनि मोरक्कोका रक्षकबाट रोकियो।

पहिलो हाफभर मोरक्कोले लय समात्न संघर्ष गर्यो। सोफियान रहिमीको टाढाबाट प्रहार गरिएको एकमात्र उल्लेखनीय प्रयास क्यानडाका गोलरक्षक म्याक्सिम क्रेपोले सहजै नियन्त्रणमा लिए।

तर दोस्रो हाफ सुरु भएसँगै खेलको स्वरूप बदलियो। ५०औं मिनेटमा अचराफ हाकिमीको आकर्षक फ्रिकिक पासमा अजेद्दिन ओउनाहीले पेनाल्टी क्षेत्रबाहिरबाट सटिक प्रहार गर्दै मोरक्कोलाई अग्रता दिलाए।

त्यसपछि बराबरीको खोजीमा लागेको क्यानडाले केही अवसर पाए पनि सदुपयोग गर्न सकेन। जोनाथन डेभिडको फ्रिकिक बारमाथिबाट बाहिरियो भने वैकल्पिक खेलाडी ताजोन बुकाननको शक्तिशाली प्रहार बोनुले उत्कृष्ट बचाउ गरे।

क्यानडा आक्रमणमा केन्द्रित भएका बेला मोरक्कोले प्रतिआक्रमणमा अर्को प्रहार गर्‍यो। ब्राहिम डियाजको पासमा ओउनाहीले ८२औं मिनेटमा व्यक्तिगत दोस्रो गोल गर्दै टोलीको अग्रता दोब्बर बनाए। त्यसपछि इन्जुरी समयको अन्तिम क्षणमा सोफियान रहिमीले तेस्रो गोल थप्दै मोरक्कोको शानदार जित सुनिश्चित गरे।

यस जितसँगै मोरक्को लगातार दोस्रो विश्वकपमा क्वार्टरफाइनल पुग्न सफल भएको छ भने क्यानडाको ऐतिहासिक यात्रा अन्त्य भएको छ। यद्यपि, सह–आयोजक क्यानडाले यस संस्करणमा पहिलो पटक समूह चरण पार गर्दै विश्वकप इतिहासमा नयाँ उपलब्धि हासिल गरेको छ।