नागरिक तहबाट सरकारलाई दैनिक ठूलो सहयोग, बुधबार मात्रै सवा १५ करोड संकलन

काठमाण्डौ । रसुवाको भोटेकोशी बाढीबाट प्रभावित नागरिकको उद्धार, राहत तथा पुनर्स्थापनाका लागि सरकारलाई नागरिक तथा संस्थागत तहबाट प्राप्त हुने सहयोगले बुधबार पनि उत्साहजनक निरन्तरता पाएको छ।

प्रधानमन्त्री दैवी प्रकोप उद्धार कोषका लागि बुधबार मात्रै १५ करोड २१ लाख ६२ हजार ४५ रुपैयाँ ९१ पैसा बराबरको सहयोग जुटेको अर्थ मन्त्रालयले जनाएको छ।

मन्त्रालयका अनुसार भदौ १७ गते अर्थमन्त्री डा. स्वर्णिम वाग्लेमार्फत २८ व्यक्ति तथा संस्थाले उक्त रकम बराबरका चेक सरकारलाई हस्तान्तरण गरेका हुन्। बुधबार प्राप्त सहयोगलाई औसतमा गणना गर्दा प्रतिव्यक्ति तथा संस्था करिब ५४ लाख ३४ हजार रुपैयाँ योगदान हुन आउँछ।

भोटेकोशी बाढीले ठूलो मानवीय तथा भौतिक क्षति पुर्‍याएपछि सरकारले खोज, उद्धार, तत्काल राहत, पुनर्स्थापना तथा पुनर्निर्माणमा सहयोग गर्न सार्वजनिक अपिल गरेको थियो। त्यसयता सर्वसाधारण नागरिकदेखि निजी क्षेत्रका प्रतिष्ठित कम्पनी, बैंक तथा वित्तीय संस्था, व्यावसायिक संघ–संगठन र विभिन्न सामाजिक संस्थाले सरकारी कोषमा सहयोग उपलब्ध गराउने क्रम जारी राखेका छन्।

विपद्पछिको पुनर्स्थापना र पुनर्निर्माणका लागि ठूलो स्रोत आवश्यक पर्ने अवस्थामा दैनिक रूपमा संकलन भइरहेको यस्तो सहयोगले सरकारमाथिको आर्थिक दबाब कम गर्न मात्रै होइन, राष्ट्रिय संकटसँग जुध्न नागरिक र निजी क्षेत्र सरकारसँगै उभिएको सन्देशसमेत दिएको छ।

अर्थ मन्त्रालयले बुधबार चेक हस्तान्तरण गर्ने व्यक्ति तथा संस्थाको संख्या र कुल रकम सार्वजनिक गरे पनि सहयोगदाताको नाम तथा उनीहरूले उपलब्ध गराएको छुट्टाछुट्टै रकमको विवरण भने तत्काल खुलाएको छैन।