विज्ञ टोलीसँगै रसुवा पुगे गगन थापा, बाढी क्षतिको स्थलगत अध्ययन सुरु

NEWS
शुक्रबार, भाद्र १९,२०८३ 11:33:13

काठमाण्डौ । नेपाली कांग्रेसका सभापति गगन थापा विज्ञ टोलीसहित भोटेकोशी बाढीबाट प्रभावित रसुवा पुगेका छन्।

सभापति थापा शुक्रबार बिहान रसुवाको नौकुण्ड गाउँपालिका–३ स्थित घिचेत क्षेत्रमा पुगेर बाढीले पुर्‍याएको मानवीय, भौतिक तथा आर्थिक क्षतिको स्थलगत अवस्था बुझ्न थालेका हुन्।

उनको सचिवालयका अनुसार थापासँग विभिन्न क्षेत्रका विज्ञसमेत सहभागी छन्। टोलीले प्रभावित क्षेत्रको स्थलगत निरीक्षण गर्दै स्थानीय बासिन्दा, जनप्रतिनिधि तथा सरोकारवालासँग बाढीपछिको अवस्था, तत्कालीन आवश्यकता र पुनर्निर्माणका चुनौतीबारे जानकारी लिनेछ।

भदौ १० गते भोटेकोशीमा आएको विनाशकारी बाढीले रसुवासहित नुवाकोट र धादिङका विभिन्न क्षेत्रमा ठूलो जनधनको क्षति पुर्‍याएको थियो। सडक, पुल, जलविद्युत् आयोजना, निजी घर तथा अन्य भौतिक संरचनामा व्यापक क्षति पुगेपछि प्रभावित क्षेत्रमा उद्धार, राहत र पुनर्निर्माणको काम जारी छ।

थापाले यसअघि भदौ १५ गते नुवाकोटको विदुर नगरपालिका–३ स्थित बाढी प्रभावित क्षेत्रमा समेत पुगेर स्थलगत निरीक्षण गरेका थिए।

बिहीबार मात्रै उनले नेपाली कांग्रेसका तर्फबाट प्रभावित क्षेत्रको वस्तुस्थिति अध्ययन गरी विस्तृत प्रतिवेदन तयार पारिने बताएका थिए। स्थलगत निरीक्षणबाट संकलित तथ्य, प्रभावितको अवस्था तथा विज्ञहरूको सुझाव समेटेर प्रतिवेदन सार्वजनिक गर्ने कांग्रेसको तयारी छ।

बाढीपछि तत्काल राहतसँगै दीर्घकालीन पुनर्निर्माण, जोखिमयुक्त बस्तीको व्यवस्थापन, सडक तथा पुल पुनःस्थापना र प्रभावित क्षेत्रको आर्थिक पुनरुत्थान प्रमुख चुनौतीका रूपमा देखिएका छन्।

कांग्रेस सभापति थापाको पछिल्लो रसुवा भ्रमणलाई पार्टीले बाढी प्रभावित क्षेत्रको वास्तविक अवस्था बुझेर पुनर्निर्माण तथा नीतिगत सुझाव तयार गर्ने अभियानको निरन्तरताका रूपमा लिएको छ।