हाथवे इन्भेष्टमेन्टका दुई संस्थापकले बेच्दै ६.८५ लाख कित्ता सेयर

काठमाण्डौ । हाथवे इन्भेष्टमेन्ट नेपाल लिमिटेडका दुई संस्थापक सेयरधनीले आफ्नो नाममा रहेको ठूलो परिमाणको सेयर बिक्री गर्ने भएका छन्।

कम्पनीका संस्थापक सेयरधनी सुमित प्रधान र मनिष ढकालले आफ्नो नाममा रहेको सेयर बिक्री गर्न चाहेको जानकारी कम्पनीलाई गराएका हुन्। सोहीबमोजिम कम्पनीले नेपाल स्टक एक्सचेन्ज (नेप्से)लाई समेत जानकारी गराएको छ।

कम्पनीका अनुसार प्रधानले आफ्नो नाममा रहेको ३ लाख ४८ हजार ६८६ कित्ता तथा ढकालले ३ लाख ३७ हजार ६१ कित्ता सेयर बिक्री गर्न लागेका हुन्।

यसअनुसार दुवै संस्थापक सेयरधनीले कुल ६ लाख ८५ हजार ७४७ कित्ता सेयर बिक्री गर्ने तयारी गरेका छन्।

नेपाल धितोपत्र बोर्डको निर्देशनबमोजिम आधारभूत सेयरधनीले आफूले धारण गरेको ५ प्रतिशत वा सोभन्दा बढी सेयर बिक्री गर्नुभन्दा कम्तीमा १५ दिनअघि सम्बन्धित निकायलाई जानकारी गराउनुपर्ने व्यवस्था छ।

सोही प्रावधानअनुसार प्रधान र ढकालले सेयर बिक्री गर्न लागेको विषयमा कम्पनीलाई जानकारी गराएका हुन् भने कम्पनीले उक्त विवरण नेप्सेलाई उपलब्ध गराएको हो।