हाथवेमा संस्थापक सेयर बिक्रीको लहर, ८.८५ लाख कित्ता बेच्ने तयारी

काठमाण्डौ । हाथवे इन्भेष्टमेन्ट नेपाल लिमिटेडको सेयरमा रहेको लकइन अवधि समाप्त भएसँगै कम्पनीका आधारभूत सेयरधनीहरू धमाधम आफ्नो स्वामित्वमा रहेको सेयर बिक्री गर्ने तयारीमा जुटेका छन्।

लकइन खुलेपछि कम्पनीका आधारभूत सेयरधनीबाट लगातार ठूलो परिमाणको सेयर बिक्री गर्ने पूर्वसूचना आउन थालेको हो। पछिल्लोपटक आधारभूत सेयरधनी अम्बिका शर्मा लामिछानेले आफ्नो स्वामित्वमा रहेको २ लाख कित्ता सेयर बिक्रीका लागि प्रक्रिया अघि बढाएकी छन्।

उनले सेयर बिक्री गर्ने मनसायसहित कम्पनीमा निवेदन दिएपछि कम्पनीले नियमानुसार नेपाल स्टक एक्सचेन्ज (नेप्से)लाई त्यसबारे जानकारी गराएको छ।

अम्बिकाभन्दा अघि पनि हाथवेका दुई आधारभूत सेयरधनीले ठूलो परिमाणमा सेयर बिक्री गर्न निवेदन दिइसकेका थिए।

आधारभूत सेयरधनी सुमित प्रधानले ३ लाख ४८ हजार ६८६ कित्ता सेयर बिक्रीका लागि निवेदन दिएका थिए। यस्तै, अर्का आधारभूत सेयरधनी मनिष ढकालले ३ लाख ३७ हजार ६१ कित्ता सेयर बिक्री गर्न कम्पनीमा निवेदन दिएका थिए।

दुवैको निवेदनबमोजिम हाथवे इन्भेष्टमेन्टले सेयर बिक्रीसम्बन्धी जानकारी यसअघि नै नेप्सेलाई गराइसकेको थियो।

यससँगै हालसम्म सार्वजनिक भएको विवरणअनुसार प्रधान, ढकाल र लामिछाने गरी तीन आधारभूत सेयरधनीले कुल ८ लाख ८५ हजार ७४७ कित्ता सेयर बिक्रीका लागि प्रक्रिया अघि बढाएका छन्।