सुनको मूल्यमा पहिरो, एकैदिन प्रतिऔंस ८३ डलरले घट्यो

Gold
आईतवार, जेष्ठ २७,२०८१ 09:00:34

काठमाण्डौ । अन्तराष्ट्रिय बजारमा आज सुनको मूल्यमा व्यापक गिरावट आएको छ । आज अन्तराष्ट्रिय बजारमा सुनको मूल्य प्रतिऔंस ३.५० प्रतिशत अर्थात ८३.१५ डलरले घटेको छ ।

यससँगै सुनको मूल्य प्रतिऔंस २ हजार २९३.८४ डलरमा झरेको छ ।

सुनसँगै चाँदीको मूल्यमा पनि व्यापक गिरावट आएको छ। चाँदीको मूल्य प्रतिऔंस ६.९१ प्रतिशत अर्थात २.१७ डलरले घटेको छ । यो गिरावटसँगै अन्तराष्ट्रिय बजारमा चाँदीको मूल्य प्रतिऔंस २९.१७ डलर कायम भएको छ ।

अमेरिकाको बलियो ननफार्म पेरोल रिपोर्ट सार्वजनिक भएसँगै अन्तराष्ट्रि बजारमा सुनको मूल्यमा पहिरो गएको हो । अमेरेकी १० वर्षे बोन्डको प्रतिफल गत अप्रिल महिना यताकै न्यून अर्थात ४.२७१ प्रतिशत कायम भएको छ । तर अमेरिकी अर्थतन्त्रमा सुधारका संकेतहरु देखिएको श्रमबजारमा समेत रोजगारी सिर्जना भईरहेकाले तत्कालै अमेरिकी कन्द्रीय बैंकले ब्याजदरमा कटौती गर्ने सम्भावना नरहेको विश्लेषकहरुले बताएका छन् ।

१० वर्षे प्रतिफलले आगामी कारोबारमा ४.५० प्रतिफलमा रेसिस्टेन्ट टेस्ट गर्ने सम्भावना रहेको र यो सुनको वियरिस हुने विश्लेषण गरिएको छ ।

गत साता क्यानडाको केन्द्रीय बैंक र यु्रोपेली केन्द्रीय बैंकले ब्याजदरमा कटौती गरेपछि भने मे २२ मा सुनको मूल्य अन्तराष्ट्रिय बजारमा हालसम्मकै उच्च कायम भएको थियो । त्यसदिन सुनको मूल्य प्रतिऔंस २ हजार ३८७ डलर कायम भएको थियो ।

उता चीनको केन्द्रीय बैंकले पनि सुनको खरिद घटाएको छ । तथ्यांकअनुसार गत महिना चीनको केन्द्रीय बैंकले कुनै पनि सुन खरिद गरेको छैन । यसले १८ महिनादेखि निरन्तर सुन खरिद गरिरहेको चीनको खरिदमा ब्रेक लागेको छ ।