सुनको मूल्य झण्डै २५ डलरले बढ्यो, यस्तो छ बढ्नुको कारण

Gold
आईतवार, भाद्र ९,२०८१ 08:19:04

काठमाण्डौ । अन्तराष्ट्रिय बजारमा सुनको मूल्य पुनः२५ सय डलरभन्दा बढी पुगेको छ । पछिल्लो कारोबारमा सुनको मूल्य १ प्रतिशत अर्थात २४.८० डलरले बढेको छ ।

यससँगै अन्तराष्ट्रिय बजारमा सुनको मूल्य प्रतिऔंस २ हजार ५१२.१८ डलर पुगेको छ । शुक्रबार अमेरिकी डलर थप कमजोर बन्दा र अमेरिकी बोन्डको प्रतिफल समेत घट्दा सुनको मूल्य बढेको हो ।

अमेरिकी केन्द्रीय बैंकका अध्यक्ष जेरोमी पावेलले मुद्रास्फिती २ प्रतिशतको लक्ष्यतर्फ अग्रसर भएको र सेप्टेम्बर महिनाका लागि ब्याजदर कटौती हुने बताएपछि डलर र बोन्डको प्रतिफलमा गिरावट आएको छ । जसका कारण लगानीकर्ताले पुनः सुनमा लगानी बढाएका छन् ।

अमेरिकी १० वर्षे बोन्डको प्रतिफल ५ बेसिक प्वइन्टले घट्दै ३.८० मा सीमित बनेको छ । लगानीकर्ताले फेडरल रिजर्भले सेप्टेम्बर महिनाका लागि ५० बेसिक प्वइन्टले ब्याजदर कटौती गर्न सक्ने अनुमान गरेका छन् ।

यस्तै अन्तराष्ट्रिय बजारमा चाँदीको मूल्य समेत बढेको छ । चाँदीको मूल्य ०.७९ डलरले बढेर प्रतिऔंस २९.८३ डलर कायम भएको छ ।