.gif)
.gif)
.jpg)
.png)
काठमाण्डौ । प्रधानमन्त्री तथा गठबन्धन सरकारको नेतृत्व गरिरहेको दल नेकपा एमालेका अध्यक्ष केपी शर्मा ओली र नेपाली कांग्रेसका सभापति शेरबहादुर देउवाबीच भएको सहमतिअनुसार राष्ट्रिय स्वतन्त्र पार्टीका सभापति रवि लामिछाने पक्राउ पर्ने लगभग निश्चित झै देखिएको छ ।
सत्तारुढ गठबन्धनका प्रमुख दलका प्रमुखहरुबीच संसदीय छानबिन विशेष समितिको प्रतिवेदन मन्त्रिपरिषदबाट स्वीकृत गराई दोषी देखिएकाहरुमाथि आवश्यक कारबाही अगाडि बढाउने बुधबार दिउँसो सहमति भएको थियो ।
सोही सहमतिअनुसार बुधबार साँझ बसेको मन्त्रिपरिषद बैठकले सहकारी संस्था बचत रकम दुरुपयोग सम्बन्धमा संसदीय छानबिन विशेष समितिको प्रतिवेदन स्वीकृत गरेको छ ।
विशेष समितिको प्रतिवेदन स्वीकृत गर्दै कार्यान्वयनका लागि सम्बन्धित मन्त्रालयमा पठाउने मन्त्रिपरिषदको बैठकले निर्णय गरेको एक मन्त्रीले जानकारी दिएका छन् ।
उनकाअनुसार संसदीय छानबिन विशेष समितिले सूर्यदर्शन, सुप्रिम लगायतका सहकारीको रकम गोर्खा मिडियामा अपचलन भएको निष्कर्षसहित पूर्वगृहमन्त्री एवम् रास्वपाका सभापति रवि लामिछानेसहित जीबी राई, कुमार रम्तेल र छविलाल जोशीलाई कारबाही गर्न सिफारिस गरेको छ । मन्त्रिपरिषदले प्रतिवेदन कार्यान्वयनमा लैजाने निर्णय गरेपछि सिफारिसबमोजिम नै रवि लामिछानेमाथि समेत कारबाही हुनेछ ।
सम्भवतः एकदुई दिनमै रास्वपा सभापति लामिछाने पक्राउ पर्न सक्नेछन् ।
'प्रधानमन्त्रीले आफ्नो अमेरिका भ्रमणअघि नै संसदीय समितिको प्रतिवेदन कार्यान्वयन भएको हेर्न चाहनुभएजस्तो देखिन्छ ।' ती मन्त्रीले बिजशालासँग भने-'लामिछानेलाई हिरासतमा लिई कारबाही अगाडि बढाउने विषयमा प्रधानमन्त्री दृढ देखिनुहुन्छ । '
संयुक्त राष्ट्रसंघको ७९ औं महासभामा भाग लिन प्रधानमन्त्री केपी शर्मा ओलीसहितको नेपाली प्रतिनिधिमण्डल ४ असोजमा अमेरिका जाने कार्यक्रम छ । ओली ८ असोजमा अमेरिकाको न्यूयोर्कमा सुरु हुने राष्ट्रसंघको महासभाको उद्घाटन समारोहमा सहभागी हुने बताइएको छ ।
.png)
.gif)
