कक्षा १२ को ग्रेडवृद्धि परीक्षामा ७०.६०% विद्यार्थी उत्तीर्ण

काठमाण्डौ । कक्षा १२ को ग्रेडवृद्धि (पूरक परीक्षा)मा ७०.६० प्रतिशत विद्यार्थी उत्तीर्ण भएका छन् । राष्ट्रिय परीक्षा बोर्डले बोर्डले आज सार्वजनिक गरेको नतिजाअनुसार ८६ हजार दुई सय ४६ विद्यार्थीले सबै विषयमा ग्रेड प्राप्त गरी उत्तीर्ण भएका हुन् ।  

बोर्डले गत भदौ २५ र २६ गते सञ्चालन गरेको कक्षा १२ को ग्रेडवृद्धिमा १ लाख २२ हजार एक सय ७१ विद्यार्थी सहभागी भएका थिए ।  

परीक्षामा दुई जनाको नतिजा रद्द गर्नुका साथै तीन जनाको परीक्षा स्थगित भएको थियो । सार्वजनिक भएको नतिजामा परीक्षार्थीलाई चित्त नबुझेर पुनर्योग गर्न चाहनेले १५ दिनभित्र आवेदन दिनसक्ने बोर्डले जनाएको छ ।