नेप्सेको प्राङ्गणमा तयार भयो बुल, लगानीकर्ता किन भए असन्तुष्ट ?

काठमाण्डौ । नेप्सेको प्राङ्गणमा बुलको प्रतिमा तयार भएको छ । निर्माण सुरु भएको लामो समयपछि अन्ततः बुलको प्रतिमा तयार भएको हो ।  

तर सबै संरचना तयार नभएको भन्दै तत्काल उद्घाटन भने नहुने भएको छ । नेप्सेका प्रवक्ता मुराहरी पराजुलीले दिएको जानकारी अनुसार नेप्से वरपिरि अन्य संरचना तयार हुँदै गरेको कारण तत्काल उद्घाटन हुनेछैन । सम्भवतः तिहारपछि नै उद्घाटन हुनसक्ने  पराजुलीले जानकारी दिए ।

लगानीकर्ताहरुले लामो समयको मागपछि तयार भएको बुल भने साँढे नभएर बाच्छो भएको प्रतिक्रिया दिएका छन् । लगानीकर्ता केशब कोइरालाले आफ्नो फेसबुक पेजमा नेप्सेमा हाल तयार भएको साँढे लगानीकर्ताले अपेक्षा गरेको भन्दा सानो भएको प्रतिक्रिया दिएका छन् । कोइरालाले साँढे बनाउन ठ्याक्कै कति रकम लाग्यो ? हाकिम साहेबहरु मोटाएका कारण साँढे दुब्लाएको त होइन ? हिसाबकिताब पारदर्शी गराउनुपर्यो ।’-भन्दै प्रश्न गरेका छन् ।  

यसै विषयमा प्रतिक्रिया दिदैं नेप्सेका प्रवक्ता मुराहरी पराजुलीले नेप्सेको साँढे न्यूर्योक स्टक एक्सचेञ्जपछिकै ठूलो बनेको दाबी गरे । ‘अहिले केही व्यक्तिले फोटो मात्रै हेरेर यसबारे प्रतिक्रिया दिएका छन् । यो साँढे भनेको १० बाई १२ फुटको निर्माण भएको छ । यो विश्वकै दोस्रो ठूलो साँढे हो,’ उनले भने ।  

हाल नेप्सेमा तयार भएको बुल कालिगढ बिष्णु बरालले बनाएका हुन् । बरालले पनि आफूले संसारका बुलहरु हेरेको र यो बुल औषतभन्दा ठूलो नै बनेको दाबी गरे । उनले 'बुल सानो भयो' भन्नेहरुलाई एकपटक नेप्सेमा नै गएर बुल हेरेर प्रतिक्रिया दिन अनुरोध गरेका छन् ।