मिड सोलु हाईड्रोपावरको नाफा १९१०% ले बढ्यो, रिजर्भको आकार पनि उल्लेख्य वृद्धि

काठमाण्डौ । मिड सोलु हाईड्रोपावर लिमिटेडको आम्दानी बढ्दा नाफामा उल्लेख्य सुधार आएको छ । कम्पनीले चालु् आवको पहिलो त्रैमाससम्म ३ करोड ४३ लाख रुपैयाँ खुद नाफा आर्जन गरेको छ । यो रकम अघिल्लो आवको तुलानमा १९१०.११ प्रतिशतले धेरै हो । अघिल्लो आवको पहिलो त्रैमाससम्म कम्पनीले १७ लाख ७ हजार रुपैयाँ मात्रै नाफा आर्जन गरेको थियो ।  

यो अवधिमा कम्पनीको विद्युत बिक्री आम्दानी पनि ५४.०५ प्रतिशतले बढेको छ । अघिल्लो आवमा ५ करोड ७३ लाख रुपैयाँ रहेको विद्युत बिक्री आम्दानी बढेर ८ करोड ८३ लाख रुपैयाँ पुगेको छ ।  

कम्पनीको खुद सञ्चालन मुनाफा पनि ३ करोड ९३ लाखबाट बढेर ६ करोड २३ लाख रुपैयाँ पुगेको छ । कम्पनीको वित्त खर्चमा गिरावट आएको छ । वित्त खर्च २७.३८ प्रतिशतले घटेर २ करोड ७३ लाख रुपैयाँमा सीमित बनेको छ । कम्पनीको रिजर्भको आकारमा उछाल आएको छ । रिजर्भको आकार ४ लाख ३६ हजार रुपैयाँबाट बढेर ५ करोड ६४ लाख रुपैयाँ पुगेको छ ।  

कम्पनीको कुल चालु सम्पत्ति १९ करोड ३० लाख र कुल चालु दायित्व १ करोड ७१ लाख रुपैयाँ कायम भएको छ ।  

यो अवधिसम्म कम्पनीले १ अर्ब ३४ करोड रुपैयाँबराबरको दीर्घकालिन कर्जा र ८५ लाख रुपैयाँबराबरको अल्पकालिन कर्जा लिएको छ ।  

समीक्षा अवधिसम्म कम्पनीको प्रतिसेयर आम्दानी १८.३४ रुपैयाँ, प्रतिसेयर नेटवर्थ १०७.५४ रुपैयाँ, प्रतिसेयर कुल सम्पत्तिको मूल्य २८८.९७ रुपैयाँ र मूल्य आम्दानी अनुपात ५२.८८ गुणा कायम भएको छ ।