ओमानी रियाललाई परिवर्त्य विदेशी मुद्राको मान्यता

काठमाण्डौ । नेपाल राष्ट्र बैंकले ओमानी रियाललाई परिवर्त्य विदेशी मुद्राको रुपमा मान्यता दिएको छ । राष्ट्र बैंकको विदेशी विनिमय व्यवस्थापन विभागले आज एक सूचना जारी गर्दै यस्तो व्यवस्था गरेको हो ।  

केन्द्रीय बैंकले विदेशी विनिमय (नियमित गर्ने) ऐन, २०१९ को दफा २ (ग१) मा व्यवस्था भएबमोजिम ओमानी रियाललाई परिवर्त्य विदेशी मुद्रा तोकिएको हुँदा सोही बमोजिम गर्न/गराउन विदेशी विनिमय (नियमित गर्ने) ऐन, २०१९ को दफा १२ ले दिएको अधिकार प्रयोग गरी सूचना प्रकाशन गरेको जनाएको छ ।  

विदेशी विनिमय कारोबारको इजाजतपत्रप्राप्त संस्थाहरुबाट सटही गर्न सकिने दैनिक रुपमा विनिमय दर प्रकाशित गरिने नेपाल राष्ट्र बैंकबाट तोकिएका विदेशी मुद्राहरुलाई परिवर्त्य विदेशी मुद्रा भनिन्छ ।  

हालको व्यवस्थाअनुसार नेपालमा २० वटा विदेशी मुद्राहरु परिवर्त्य विदेशी मुद्राको रुपमा रहेका छन् । अमेरिकन डलर,अष्ट्रेलियन डलर,सिंगापुर डलर,चाइनिज युआन,डेनिस क्रोनर,बहराइन डिनार,क्यानेडियन डलर,मलेशियन रिङगेट,पाउण्ड स्टर्लिङ,युरो,स्विस फैङ्क,युएई डिराम,कतारी रियाल,स्विडिस क्रोनर,हङकङ डलर,दक्षिण कोरियन वन,साउदी अरब रियाल,थाई भाट,कुवेती डिनार र जापानीज येन २० वटा विदेशी मुद्राहरु परिवर्त्य विदेशी मुद्रा हुन् । अब यसमा ओमानी रियाल पनि थपिएको छ ।  

भारतीय मुद्रासँग भने नेपाली रुपैयाँको स्थिर विनिमयदर कायम गरिएको छ ।