टेस्लाको बजार पूँजीकरण ५७० बिलियन डलरभन्दा बढी, कारको माग भने अझै कमजोर

काठमाण्डौ । अमेरिकी धनाढ्य एलन मस्कको कम्पनी, टेस्लाको बजार पूँजीकरण ५७० बिलियन डलर भन्दा बढी पुगेको छ । बितेको ७ हप्तामा कम्पनीको सेयरमूल्यमा अचानक आएको वृद्धिका कारण कम्पनीको बजार पूँजीकरण ५७० बिलियन डलरभन्दा बढी पुगेको हो ।  

२ महिनाअघिसम्म कम्पनीको कम्पनीको सेयरमूल्यमा निरन्तर घटिरहेको थियो । तर अमेरिकी राष्ट्रपति पदमा डोनाल्ड ट्रम्प नियुक्त भएसँगै कम्पनीको सेयरमूल्यमा सुधार आउन थालेको छ । यससँगै टेस्ला एस एण्ड पी ५००मा कारोबार गर्ने यस वर्षकै उत्कृष्ठ प्रदर्शन गर्ने कम्पनी बनेको छ ।  

कम्पनीको सेयरमूल्यमा उछाल आउनुको कुनै विशेष कारण भने छैन । कम्पनीको कारको मागमा अझै पनि सुधार आउन सकेको छैन । यस्तै कम्पनीको आगामी यात्रा पनि अनिश्चित नै रहेको छ । यद्यपी एलन मस्कले अंगालेको राजनीतिक बाटोका कारण लगानीकर्ताले कम्पनीप्रति विश्वास बढाएका छन् । मस्कले अमेरिकी राष्ट्रपति निर्वाचनका क्रममा डोनाल्ड ट्रम्पलाई खुलेर समर्थन गरेका थिए ।  

अमेरिकी राष्ट्रपति निर्वाचन हुनुअघि टेस्लाको सेयरमूल्यमा वार्षिक २.३ प्रतिशतको गिरावट आएको थियो । तर निर्वाचन समाप्त भएपश्चात भने कम्पनीको सेयरमूल्य ७३ प्रतिशतले बढिसकेको छ । समग्रमा यो वर्ष कम्पनीको सेयरमूल्य ६९ प्रतिशतले बढेको छ ।  

डोनाल्ड ट्रम्पको कार्यकालमा ईभी निर्माता कम्पनीहरुका लागि सहज नीति ल्याइने विश्वास गरिएको छ । लगानीकर्ताले टेस्लाको स्वचालित कारका लागि पनि उचित व्यवस्था हुने विश्वास गरेका छन् ।