सामाजिक सञ्जालमा जो कोहीलाई विश्वास नगरौं, क्षणिक लोभ वा ट्रेन्डलाई पछ्याए ठूलो आर्थिक नोक्सान हुनसक्छ: राष्ट्र बैंक

काठमाण्डौ । नेपाल राष्ट्र बैंकले सामाजिक सञ्जालमा जो कोहीलाई विश्वास नगर्न सबैलाई सचेत गराएको छ । राष्ट्र बैंकले वित्तीय चेतनाका लागि एक सूचना जारी गर्दै यस्तो आग्रह गरेको हो ।  

वित्तीय चेतना अभिवृद्धि गर्ने उद्देश्यले राष्ट्र बैंकको संयोजनामा "Think before you follow, wise money tomorrow' भन्ने नाराका साथ 'Global Money Week (GMW 2025 ) मार्च १७ देखि २३ सम्म मनाइएको छ । ग्लोबल मनि विकमा उल्लेख भएजस्तै सामाजिक सञ्जालमा चर्चा पाएका सबै विषय र तिनका Influencers सो विषयका विज्ञ नहुन पनि सक्ने र गलत Influencers को कुराबाट प्रभावित भई वित्तीय निर्णय लिँदा आर्थिक नोक्सानी हुन सक्नेतर्फ सचेत रहन राष्ट्र बैंकले आग्रह गरेको छ ।  

‘अहिलेको आधुनिक र खुल्ला युगमा सामाजिक सञ्जालमा पत्यारिला जस्ता लाग्ने थुप्रै वित्तीय जानकारी, उपाय र सुझावहरू भेटिन सक्छन् । त्यस्ता सुझाव वा जानकारीको भरमा पर्नु वा त्यस्ता व्यक्ति (Financial Influencers- Finfluencers)लाई फलो गर्नुअघि सो सूचना तथा सुझाव सही हुन् वा होइनन् मनन गरौँ,’ सूचनामा उल्लेख छ, ‘कुनै पनि वित्तीय निर्णय लिँदा सोसम्बन्धी स्वाध्ययन, अनुसन्धान र गहन विचार वा विश्वसनीय स्रोतहरूसँग परामर्श गरौं । क्षणिक लोभ वा ट्रेन्डलाई पछ्याएर गरिने वित्तीय निर्णयले ठुलो आर्थिक नोक्सान गराउन सक्ने भएकोले यसतर्फ सचेत रहौँ ।’