एनआईसी एशिया बैंकका सीईओ न्यौपानेले दिए राजीनामा

काठमाण्डौ । एनआईसी एशिया बैंकका प्रमुख कार्यकारी अधिकृत रोशनकुमार न्यौपानेले राजीनामा दिएका छन् ।  

सञ्चालक समितिसँग असहमतिका बीच उनले निकै अगाडि नै बैंक छाड्न खोजेका थिए । तर, बैंकले भोगेको विषम परिस्थितिका कारण उनलाई थुमथुमाउँदै राखिएकोमा सञ्चालक समितिले राजीनामा स्वीकृत गरेको हो । 

पछिल्लो समय बैंकले न्यौपानेले बिहीबार राजीनामा गरेको र त्यसदिन नै सञ्चालक समितिले उनको राजीनामा स्वीकृत गरेको दाबी गरेको छ । न्यौपानेको कार्यकाल बाँकी छँदै राजीनामा स्वीकृत भएको हो ।

उनको राजीनामा अहिले स्वीकृत भएको जानकारी दिए पनि उनी बैंकमा लामो समयदेखि नै निस्क्रिय जस्तै थिए । अधिकांश काम डेपुटी सीईओ सन्तोषकुमार राठीले सम्हाल्ने गरेका थिए । 

बैंक सञ्चालक समितिले न्यौपानेको राजीनामा स्वीकृत गर्दै कामू सीईओको जिम्मेवारी डेपुटी सीईओ राठीलाई दिएको छ ।