एनआईसी एशियाको 'व्यापार रफ्तार': तीन सातामै १० अर्ब बराबरको कर्पोरेट लोनको प्रतिबद्धता, सेयर कर्जामा फाइलको चाङ

काठमाण्डौ । गुम्दै गएको साख जोगाउँदै सुधारको नयाँ अभियानमा समाहित एनआईसी एशिया बैंकले व्यापारलाई तीव्र गतिमा बढाउन थालेको छ ।  

प्रमुख कार्यकारी अधिकृतको रुपमा सुजितकुमार शाक्यको प्रवेशसँगै बैंकले कर्पोरेट लोनमा उल्लेख्य प्रगति गरिरहेको छ भने शून्य प्रिमियममा सार्वजनिक गरिएको सेयरधितो कर्जामा लगानीकर्ताको उच्च आकर्षण देखिएको छ । 

बैंकका सीईओ शाक्यका अनुसार पछिल्लो तीन साताको प्रयासमा विभिन्न ७ वटा हाइड्रोपावर प्रोजेक्टहरुमा एनआईसी एशियाले १० अर्ब रुपैयाँ बराबरको लगानी प्रतिबद्धता जनाइसकेको छ । यी सबै प्रोजेक्टहरुमा बैंकले कन्सोर्टियम पार्टनरको रुपमा लगानीको प्रतिबद्धता सम्बन्धी सम्झौता टुंगो लगाएको हो ।  

सम्झौता गरिएका अधिकांश जलविद्युत परियोजनाहरु निर्माणको चरणमा रहेका छन् । बैंकले आफ्नो लोन पोर्टफोलियोलाई निकट भविष्यमै कर्पोरेटमा ३० प्रतिशतको हिस्सा बनाउने गरी सुधार गर्न खोजिरहेको छ ।  

सीईओको रुपमा बैंकमा प्रवेश भएसँगै शाक्यले यसअघि एनआईसी एशियाले पर्याप्त बल नै नगरेको कर्पोरेट क्षेत्रमा लगानी बढाउन खोजिरहेको छ । विगतका केही विवादास्पद व्यवहार र कार्यशैलीले कर्पोरेट सेक्टरमा क्लाइन्टहरु रिसाएका विषयलाई मिलाउँदै शाक्यले नयाँ विश्वास कायम गर्ने गरी रणनीतिक ढंगले काम गरिरहेका देखिएको छ । 

सेयरलोनमा आकर्षण

यसैबीच, शाक्य आएको केही दिनमै घोषित शून्य प्रिमियमको सेयरधितो कर्जामा समेत लगानीकर्ताको उच्च आकर्षण देखिएको छ । आधारदरमै सेयरधितो कर्जा पाइने भएपछि यस्तो प्रडक्ट घोषणा भएको एकहप्ताभित्रै १ अर्ब बढीको लोन स्वीकृत भइसकेको छ । बाँकी ४ ५ अर्बको प्रस्ताव समेत आइसकेको सीईओ शाक्यले जानकारी दिए । 'हाम्रो कुल एपेटाइट ८ अर्ब जति हो । पहिला नै साढे २ अर्ब गइसकेको थियो । १ अर्ब थपिएपछि साढे ३ अर्ब जति पुगिसक्यो । अब आएका फाइल स्वीकृत भएपछि सेयरधितो कर्जाको एपेटाइट पनि पूरा हुन्छ ।'-शाक्यले बिजशालासँग भने ।