सानिमा बैंकको इन्टरनेट बैंकिङ अब कहिल्यै नचल्ने भएको हो ?ग्राहक रिसाए

काठमाण्डौ । सानिमा बैंकको इन्टरनेट बैंकिङ सेवा अब नचल्ने भएको छ ।  

बैंकले एक सूचना प्रकाशित गर्दै उसको इन्टरनेट बैंकिङ सेवा २०८२ मंसिर १४ गतेदेखि बन्द हुने जनाएको हो । 

उक्त सेवाको विकल्पमा व्यक्तिगत सेवाग्राहीले मोवाइल बैंकिङ एप र वेब संस्करण दुवैमा उपलब्ध हुने तथा संस्थागत सेवाग्राहीले कर्पोरेट पे सेवा प्रयोग गर्न समेत बैंकले अपील गरेको छ ।  

सानिमा बैंकको ग्राहक सेवामा कार्यरत एक कर्मचारीले बैंकको इन्टरनेट बैंकिङ अब सधैंका लागि बन्द हुन लागेको प्रष्ट पारे । 

'अब इन्टरनेट बैंकिङ चल्दैन । तर यो सेवा बन्द हुँदा मोवाइल बैंकिङमा भने कुनै प्रभाव पर्नेछैन । मोवाइलबाट पहिलाको जस्तै बैंकिङ चलाउन सकिन्छ ।' ती कर्मचारीले भने- 'डेस्कटप र ल्यापटपबाट चलाइने इन्टरनेट बैंकिङ सेवा चाहिँ अब बन्द हुनेछ ।'  

बैंकले प्रष्ट कारणबिना नै इन्टरनेट बैंकिङ बन्द गर्ने सूचना प्रकाशन गरेपछि ग्राहकहरुले आक्रोश पोखिरहेका छन् । बैंकका विभिन्न सामाजिक सञ्जाल प्ल्याटफर्ममा ग्राहकहरुले अस्पष्ट सूचना हालेको भन्दै बैंक नेतृत्वको आलोचना गरिरहेका छन् ।  

यो विषयमा सानिमा बैंकका कुनै पनि उच्चपदस्थहरुले प्रतिक्रिया दिएनन् ।