नियुक्त भएको दुई दिनमै मारिए इरानका नयाँ रक्षामन्त्री

काठमाण्डौ । इजरायल–इरान युद्धका बीच इरानका नवनियुक्त रक्षामन्त्री माजिद इब्न अल–रेजा नियुक्त भएको दुई दिनमै इजरायली आक्रमणमा मारिएको दाबी गरिएको छ। अन्तर्राष्ट्रिय सुरक्षा स्रोतहरूका अनुसार इजरायलले हाल इरानको शीर्ष सैन्य नेतृत्वलाई लक्षित गर्दै लगातार हमला गरिरहेको छ।

यसअघि भएको आक्रमणमा इरानका पूर्व रक्षामन्त्री अजिज नासिरजादेह मारिएपछि अल–रेजालाई रक्षामन्त्री नियुक्त गरिएको थियो। तर उनको पनि छोटो समयमै मृत्यु भएको दाबी बाहिरिएपछि इरानको सैन्य संरचनामा ठूलो हलचल देखिएको छ।

विश्लेषकहरूका अनुसार यो इजरायलले अपनाएको ‘डिक्यापिटेशन रणनीति’ को हिस्सा हो, जसमा शीर्ष सैन्य नेतृत्वलाई हटाएर आदेश प्रणाली र निर्णय प्रक्रियामा अव्यवस्था ल्याउने प्रयास गरिन्छ।

तर सुरक्षा विज्ञहरूका अनुसार केवल शीर्ष अधिकारी हटाउँदैमा इरानको सत्ता संरचना तत्काल कमजोर हुने सम्भावना कम छ, किनकि त्यहाँ सर्वोच्च नेता, आईआरजीसी र सुरक्षा नेटवर्क जस्ता बहु तहको शक्तिशाली संरचना रहेको बताइन्छ।