मतगणना नसकिँदै भावी मन्त्रीको चर्चा: अर्थमा स्वर्णिम, हरि ढकालको मन कृषिमा, गृहमन्त्री को ?

काठमाण्डौ । प्रतिनिधिसभा सदस्य निर्वाचन-२०८२ को मतगणना अन्तिम चरणमा छ । देशभरका निर्वाचन क्षेत्रका परिणामहरु धमाधम सार्वजनिक भइरहेका छन् ।  

यो समाचार तयार पार्दासम्म प्रत्यक्षतर्फ १६५ मध्ये १३७ स्थानको अन्तिम मत परिणाम आइसकेको छ । परिणाम आउन बाँकी क्षेत्रको मतगणना समेत अन्तिम चरणमा छ । समानुपातिकतर्फ पनि हालसम २७ लाख बढी मतको गणना भइसकेको छ । 

यसरी मतगणना अन्तिम चरणमा पुगेसँगै दुईतिहाई बहुमतका लागि अगाडि बढेको राष्ट्रिय स्वतन्त्र पार्टीबाट सरकारमा सहभागी हुने सम्भावित अनुहारहरुको नामको विषयमा चर्चा सुरु भएको छ ।  

रास्वपाभित्रै चुनावअघि भएको सहमतिअनुसार अब बन्ने सरकारको प्रधानमन्त्रीको रुपमा बालेन्द्र शाह(बालेन)को उदय हुनेछ । उनी पहिलो मधेशी मूलका प्रधानमन्त्री र कान्छो प्रधानमन्त्रीको रुपमा सरकारको नेतृत्वमा पुग्ने निश्चितप्राय छ ।  

शाह नेतृत्वको सरकारमा सहभागी हुने अन्य मन्त्रीहरुको विषयमा समेत रास्वपाभित्रै चर्चा चलाउन थालिएको छ ।  

सो दलनिकट स्रोतहरुका अनुसार बालेन नेतृत्वको सरकारमा अर्थमन्त्रीको रुपमा अर्थशास्त्री डा. स्वर्णिम वाग्ले जाने निश्चित छ । चुनावअघिदेखि नै रास्वपा सभापति रवि लामिछानेले सार्वजनिक रुपमै डा. वाग्लेलाई भावी अर्थमन्त्रीको रुपमा प्रस्तुत गरिसकेका छन् । उनलाई अर्थमन्त्री बनाउने विषयमा रास्वपाभित्र एकमत रहेको बुझिएको छ । 

त्यसबाहेकका महत्वपूर्ण मन्त्रालय बाँडफाँडमा भने केही सकस हुनसक्ने देखिन्छ ।  

रास्वपाभित्र रवि लामिछाने र बालेन शाहको दुईवटा लाइन देखिएकोले ती दुवै समूहको चित्त नदुखाउने गरी मन्त्रीहरु पठाइनेछ ।  

स्रोतहरुका अनुसार गृहमन्त्रीमा दुवै समूहको दाबी रहनेछ । रवि लामिछानेले दीपक बोहोरा र विपिन आचार्यलाई सम्भावित गृहमन्त्रीको रुपमा अगाडि सार्ने सम्भावना छ । बालेन शाहले चाहिँ राजुनाथ पाण्डेलाई गृहमन्त्रीको रुपमा अगाडि सार्न सक्छन् ।

रास्वपा गठन भएदेखि नै रवि लामिछानेको प्रिय पात्र बनेर खटिएका सेयर बजारका चर्चित लगानीकर्ता तथा चितवन १ बाट शानदार मतसहित दोश्रोपटक निर्वाचित सांसद हरि ढकाल पनि यसपटक मन्त्री बन्ने निश्चित देखिन्छ ।  

उनले आफू निकटस्थहरुसँग कृषिमन्त्री बनेर कृषिमा आमूल सुधार गर्ने बताउने गरेका छन् । उनलाई समर्थक तथा शुभेच्छुकले भने उर्जामन्त्री बन्न सुझाइरहेका समेत बुझिएको छ ।  

धनुषाबाट चुनाव जितेका मनिष झाले सञ्चारमन्त्री बन्ने मन गरेका छन् ।  

रास्वपा उपसभापति डीपी अर्याल पनि मन्त्री बन्ने लाइनमा छन् । शिशिर खनाललाई समेत शक्तिशाली मन्त्रालय दिइने बुझिएको छ । 

यस्तै, बालेन शाहसँग नजिक तथा उनी महानगरको मेयर हुँदा कोर टिममा रहेर काम गरेका सस्मित पोखरेल पनि मन्त्री बन्नसक्ने सम्भावना छ ।  

सोविता गौतम, डा. तोसिमा कार्की लगायतका सांसद समेत मन्त्री बन्ने दौडमा छन् ।  

बालेन शाह नेतृत्वको अब बन्ने सरकारमा स्वतन्त्र सांसद बनेका डा. महावीर पुनलाई शिक्षामन्त्रालय नै दिइने तयारी भएको समेत स्रोत दाबी छ ।  

ललितपुरबाट चुनाव जितेका जगदीश खरेल, कांग्रेस सभापति गगन थापालाई हराएका डा. अमरेशकुमार सिंह लगायत पनि मन्त्री बन्ने सम्भावित सूचिमा छन् ।