अर्थमन्त्रीमा ‘लास्ट मिनेट’ गेम, स्वर्णिमको ठाउँमा बुढाथोकीको नाम आएपछि तरंग !

काठमाण्डौ । नयाँ सरकार गठनको अन्तिम तयारी तीव्र बन्दै जाँदा भावी अर्थमन्त्रीको विषयमा अप्रत्याशित मोड देखिन थालेको छ । केही दिनअघिसम्म डा. स्वर्णिम वाग्ले अर्थमन्त्रीका रूपमा लगभग ‘कन्फर्म’ जस्तै देखिएका थिए । तर, मन्त्रिपरिषद् गठनको अन्तिम चरणमा नयाँ पात्रको इन्ट्रीले समीकरण बदलिने संकेत देखिएको छ ।

उच्च स्रोतकाअनुसार भावी प्रधानमन्त्री बालेन शाहले अर्थ मन्त्रालयका लागि नयाँ नाम अघि सारेका छन्: डा. कृष्णहरि बुढाथोकी । यसले अर्थमन्त्रीको दौड अन्तिम अवस्थामा एकाएक रोचक बन्ने देखिएको छ ।

रास्वपाभित्रको शक्ति सन्तुलनकैबीच आएको यो प्रस्तावलाई अर्थपूर्ण रूपमा हेरिएको छ । यसअघि पार्टी सभापति रवि लामिछाने पक्षबाट वाग्लेको नाम अघि बढाइएको थियो र उनी नै अर्थ सम्हाल्ने लगभग निश्चित जस्तै मानिएको थियो ।

तर, बालेन शाहले आफ्नै विश्वासपात्र र बलियो व्यावसायिक पृष्ठभूमि भएका व्यक्तिलाई अर्थ मन्त्रालय सुम्पने रणनीति अघि सारेको बुझिएको छ । बैंकिङ तथा वित्तीय क्षेत्रमा दुई दशकभन्दा बढी अनुभव बटुलेका बुढाथोकीलाई अघि सार्नु बालेनको ‘टेक्नोक्रेटिक अप्रोच’को संकेतका रूपमा व्याख्या गरिएको छ ।

यद्यपि, यो प्रस्तावलाई रवि लामिछानेले सहजै स्वीकार गर्ने सम्भावना कम देखिएको स्रोतको दाबी छ ।

यस घटनाक्रमले रास्वपाभित्र दुई स्पष्ट धार देखिएको छ-एकातिर बालेन समूह, अर्कोतिर रवि समूह । मन्त्री छनोटमा सहमति जुट्न नसक्दा अन्तिम सूची अझै अनिश्चित बनेको छ ।

स्रोतकाअनुसार, “मन्त्रीहरूको सूची लगभग तयार भए पनि अन्तिम समयमा फेरबदल हुने सम्भावना उच्च छ । विशेषगरी अर्थ र गृह मन्त्रालयजस्ता संवेदनशील जिम्मेवारीमा निर्णय निकै रणनीतिक हुनेछ ।”

यसैबीच, अन्य मन्त्रालयमा पनि बालेनले आफ्ना नजिकका पात्रलाई अघि सारेका छन्, जसले मन्त्रिपरिषद् सूची अनुमानभन्दा फरक र थप चाखलाग्दो बन्ने संकेत गरेको छ ।

अन्तिम घडीको यो ट्वीस्टले अब बन्ने सरकारको संरचना मात्र होइन, रास्वपाभित्रको भित्री शक्ति समीकरणलाई समेत पुनः परिभाषित गर्ने देखिएको छ । क्याबिनेट चयनकै कारण बालेन र रविबीच तिक्तता बढ्ने हो कि भन्ने आशंका पनि यतिबेला बलियो बन्दै गएको छ ।