माछापुच्छ्रे बैंकको लाभांश क्षमता र वितरणयोग्य मुनाफामा उल्लेख्य सुधार, नाफा पनि ५०%ले बढ्यो

काठमाण्डौ । माछापुच्छ्रे बैंकको लाभांश क्षमतामा उल्लेख्य सुधार आएको छ । बैंकले चालु आवको तेस्रो त्रैमाससम्म आईपुग्दा आफ्नो लाभांश क्षमता २०६९.४४ प्रतिशतले बढेर ७.८१ प्रतिशत पुगेको छ । अघिल्लो आवको सोही अवधिसम्म भने बैंकको लाभांश क्षमता ०.३६ प्रतिशतमा कायम थियो ।

यस्तै बैंकको वितरणयोग्य मुनाफा समेत ९७७.५२ प्रतिशतले बढेर ७६ करोड २२ लाख रुपैयाँ पुगेको छ । अघिल्लो आवमा यस्तो रकम ७ करोड ७ लाख रहेको थियो ।

बैंकको मुख्य आम्दानीको स्रोतको रुपमा रहेको ब्याज आम्दानी ४ अर्ब २५ करोड रुपैयाँबाट बढेर ४ अर्ब ३९ करोड रुपैयाँ पुगेको छ । ब्याज आम्दानी बढेसँगै बैंकको खुद नाफा ५०.४३ प्रतिशतले वृद्धि भएको छ । अघिल्लो आवमा १ अर्ब १० करोड रुपैयाँ रहेको बैंकको खुद नाफा १ अर्ब ६५ करोड पुगेको छ ।

बैंकिङ क्षेत्रमा हाल समस्याको रुपमा रहेको खराब कर्जा अनुपातलाई बैंकले घटाउन सफल भएको छ । अघिल्लो आवमा ४.५९ प्रतिशत रहेको बैंकको खराब कर्जा अनुपात घटेर ४.०१ प्रतिशतमा झरेको छ ।

बैंकले कस्ट अअफ फण्ड पनि ४.४२ प्रतिशतबाट घटाएर ३.४० प्रतिशत कायम गरेको छ । बैंकको सिडी रेसियो ७७.६७ प्रतिशत, बेस रेट ५.१९ प्रतिशत र रिर्टन अन इक्विटी(आरओई) १०.९० प्रतिशत रहेको छ ।

तेस्रो त्रैमाससम्म बैंकको निक्षेप संकलन १ खर्ब ८४ अर्बबाट बढेर २ खर्ब १३ अर्ब पुगेको छ । यस्तै कर्जा प्रवाह पनि १ खर्ब ४१ अर्बबाट बढेर १ खर्ब ५९ अर्ब पुगेको छ ।

समीक्षा अवधिसम्म बैंकको प्रतिसेयर आम्दानी(ईपीएस) १२.१६ रुपैयाँबाट वृद्धि भएर १८.३० रुपैयाँ पुगेको छ । बैंकको प्रतिसेयर नेटवर्थ(इक्विटी सेयरधनी) १६८.१, पीई रेसियो १३.७७ गुणा र तरलता अनुपात ३१.८७ प्रतिशत कायम भएको छ ।