महानगरको तयारी अपुग भन्दै सुकुमवासी मुद्दा एक दिन सारियो

काठमाण्डौं । सुकुमवासी बस्ती हटाउने सरकारी निर्णयविरुद्ध सर्वोच्च अदालतमा विचाराधीन रिटको सुनुवाइ फेरि एक दिनका लागि स्थगित भएको छ ।

न्यायाधीश शारंगा सुवेदी र शान्तिसिंह थापाको संयुक्त इजलासमा बुधबार पेसी तोकिएको भएपनि काठमाडौं महानगरपालिकाले आवश्यक तयारी पूरा नभएको भन्दै समय मागेपछि सुनुवाइ स्थगित गरिएको हो ।

यसअघि मंगलबार पनि मुद्दा ‘लगाउमा राख्ने’ आदेशसहित सारिएको थियो । अब बिहीबारका लागि नयाँ पेसी तोकिएको छ ।

अदालतले सबै पक्षलाई तयारीसहित बहसमा उपस्थित हुन निर्देशन दिएको रिट निवेदकमध्येकी अधिवक्ता जस्मिन ओझाले जानकारी दिइन् ।  

उनका अनुसार महानगरले औपचारिक सूचना नपाएको र तयारी अपुग भएको दाबी गरेपछि इजलासले थप समय दिएको हो ।

सुकुमवासी बस्तीसम्बन्धी तीन अलग–अलग रिट सर्वोच्चमा दायर भएका छन् । 

गोपाल रन पहेली, वरिष्ठ अधिवक्ता दिनेश त्रिपाठी र माजिद अन्सारीलगायतले दायर गरेका यी रिटलाई एकैसाथ राखेर सुनुवाइ भइरहेको छ ।

सरकारले थापाथलीसहितका क्षेत्रमा डोजर चलाउने तयारी अघि बढाएपछि प्रभावित पक्ष सर्वोच्च पुगेका थिए । पहेलीले ११ वैशाखमा रिट दायर गरेका हुन् ।

यसअघि प्रारम्भिक सुनुवाइका क्रममा सर्वोच्चले सुकुमवासी बस्ती हटाउँदा अपनाइएको विधि र प्रक्रियाबारे पाँच बुँदागत विवरण पेश गर्न सरकारलाई आदेश दिएको थियो ।  

न्यायाधीश सुनिलकुमार पोखरेलको एकल इजलासले माजिद अन्सारीसमेतको रिटमा यस्तो आदेश गरेको हो ।