‘उद्योगी-व्यवसायी थुन्ने सूची छैन, हल्लाले नतर्सिनुस्, निजी क्षेत्र सरकारको साझेदार हो’ : अर्थमन्त्री वाग्ले

काठमाण्डौ । अर्थमन्त्री स्वर्णिम वाग्लेले निजी क्षेत्रलाई लक्षित गर्दै सरकार उद्योगी/व्यवसायीमाथि धरपकड गर्ने तयारीमा रहेको भन्ने चर्चा निराधार भएको स्पष्ट पारेका छन् ।  

शुक्रबार काठमाडौंमा आयोजित एक कार्यक्रममा बोल्दै उनले उद्योगी/व्यवसायीलाई “हल्लाको राजनीति”बाट प्रभावित नहुन आग्रह गर्दै सरकार र निजी क्षेत्रबीच टकराव नभई साझेदारीको सम्बन्ध रहेको बताए ।

“निजी क्षेत्रका व्यवसायीलाई थुन्ने वा धरपकड गर्ने कुनै सूची सरकारले बनाएको छैन । हल्लाको पछि नलाग्नुस्, तपाईंहरू हाम्रो साझेदार हो,” अर्थमन्त्री वाग्लेले भने ।

सरकारले अघि सारेको १०० बिलियन डलर अर्थतन्त्र निर्माणको दीर्घकालीन लक्ष्य निजी क्षेत्रको सहकार्यबिना सम्भव नहुने उल्लेख गर्दै उनले आर्थिक रूपान्तरणको यात्रामा उद्योगी/व्यवसायीलाई सरकारको मुख्य सहयात्रीको रूपमा चित्रण गरे ।

कार्यक्रममा उनले सरकारका पाँच प्रमुख प्राथमिकतासमेत सार्वजनिक गरे । उनका अनुसार पहिलो प्राथमिकता सुशासन, दोस्रो अर्थतन्त्रको पुनरुत्थान, तेस्रो आन्तरिक तथा बाह्य कनेक्टिभिटी विस्तार, चौथो सामाजिक क्षेत्रमा लगानी र पाँचौं पर्यटन, संस्कृति तथा इतिहासमार्फत नेपालको ‘सफ्ट पावर’ विस्तार रहेको छ ।

अर्थतन्त्र अहिले निर्णायक मोडमा पुगेको उल्लेख गर्दै उनले आगामी बजेटले सुधारको स्पष्ट संकेत दिने दाबीसमेत गरे । “अर्थतन्त्रको जहाज मोड्ने चरणमा हामी छौं । केही समय धैर्य गर्नुस्, आगामी बजेटसम्म पर्खिनुस्,” उनले निजी क्षेत्रलाई सम्बोधन गर्दै भने ।

भारतको आर्थिक उछाललाई उदाहरणका रूपमा प्रस्तुत गर्दै अर्थमन्त्री वाग्लेले राजनीतिक स्थायित्व, स्पष्ट दृष्टिकोण र इमानदार कार्यान्वयन भए नेपालले पनि तीव्र आर्थिक फड्को मार्न सक्ने दाबी गरे ।

“सन् २०१४ १५ मा नरेन्द्र मोदीले सत्ता सम्हाल्दा भारतका केही आर्थिक सूचक अहिलेको नेपालकै हाराहारीमा थिए । तर एक दशकमा भारतले असाधारण फड्को मार्यो । अब नेपालले पनि त्यही दिशातर्फ अघि बढ्ने बेला आएको छ,” उनले भने ।