दुई वर्षमा पहिलोपटक बढायो टेस्लाले मोडल वाईको मूल्य

काठमाण्डौ । विद्युतीय सवारी निर्माता टेस्लाले अमेरिकामा आफ्ना मोडल वाई कारहरुको मूल्य बढाएको छ। कम्पनीको आधिकारिक वेबसाइटअनुसार शनिबारदेखि विभिन्न मोडलहरूको मूल्य संशोधन गरिएको हो।

नयाँ मूल्यसूचीअनुसार मोडल वाई प्रिमियम अल ह्विल ड्राइभको मूल्य १ हजार डलरले बढाएर ४९ हजार ९९० डलर कायम गरिएको छ। त्यस्तै, मोडल वाई प्रिमियम रियर ह्विलको मूल्य पनि १ हजार डलरले वृद्धि गर्दै ४५ हजार ९९० डलर पुर्याइएको छ।

यसैगरी, मोडल वाई परफर्मेन्स अल ह्विल ड्राइभको मूल्य ५ सय डलरले बढाएर ५७ हजार ९९० डलर निर्धारण गरिएको कम्पनीको वेबसाइटमा उल्लेख छ।

कम्पनीले मूल्यवृद्धिको कारण भने सार्वजनिक गरेको छैन।

गत वर्षको अगस्टमा टेस्लाले आफ्नो सबैभन्दा महँगो टेस्ला साइबर ट्रक मोडलको मूल्य अमेरिकामा १५ हजार डलरसम्म बढाएको थियो।

टेस्लाले पछिल्लो समय मोडल वाईको मूल्य दुई वर्षअघि अर्थात सन् २०२४ मा बढाएको थियो । त्यसबेला टेस्लाले सम्पूर्ण मोडलको मूल्य १ हजार डलरले वृद्धि गरेको थियो ।