प्रधानमन्त्रीको अभिव्यक्तिले प्रतिनिधिसभा ठप्प, एक घण्टा बित्दा पनि बैठक शुरु भएन

काठमाण्डौं । संघीय संसद्को प्रतिनिधिसभा बैठक निर्धारित समयभन्दा एक घण्टाभन्दा बढी ढिला हुँदा पनि शुरु हुन सकेको छैन ।  

दिउँसो १ बजेका लागि बोलाइएको बैठक सरकार र विपक्षी दलबीच बढ्दो राजनीतिक टकरावका कारण अन्योलमा परेको छ।

प्रधानमन्त्री बालेन्द्र शाहले संसद्मा दिएको विवादास्पद अभिव्यक्तिलाई लिएर विपक्षी दलहरू आक्रामक बनेपछि प्रतिनिधिसभाको वातावरण थप तनावपूर्ण बनेको हो।  

विपक्षी दलहरूले प्रधानमन्त्रीको भनाइ राष्ट्रिय हितविपरीत रहेको निष्कर्ष निकाल्दै उनी स्वयं सदनमा उपस्थित भएर स्पष्टीकरण दिनुपर्ने र सार्वजनिक रूपमा माफी माग्नुपर्ने अडान दोहोर्‍याएका छन्।

विपक्षी दलहरूको माग केवल माफीमा सीमित छैन।  

उनीहरूले प्रधानमन्त्रीको उक्त अभिव्यक्ति संसद्को आधिकारिक अभिलेखबाट हटाइनुपर्ने शर्तसमेत अघि सारेका छन्।  

यी माग पूरा नभएसम्म सदनको कारबाही अघि बढ्न नदिने रणनीति विपक्षी दलहरूले बनाएका छन्।

संसद् सचिवालयले बैठकको समय तोके पनि दलहरूबीच सहमति जुट्न नसक्दा बैठक शुरु हुन नसकेको स्रोतहरूले बताएका छन्।  

सत्तापक्ष र प्रतिपक्षबीच अनौपचारिक छलफल जारी रहे पनि अहिलेसम्म कुनै निकास निस्किएको छैन।

यसअघि आइतबारको बैठकमा पनि संसद्मा चर्को विवाद भएको थियो।  

 

प्रतिनिधिसभा नियमावली पारित गर्ने क्रममा विपक्षी सांसदहरूले वेल घेराउ गरेर विरोध जनाएका थिए।  

तर, सभामुख डोलप्रसाद अर्यालले अवरोधका बीच पनि बैठक सञ्चालन गर्दै राति करिब १० बजे नियमावली पारित भएको घोषणा गरेका थिए।

विपक्षी दलहरूले त्यस घटनालाई समेत संसदीय अभ्यासविपरीत भएको दाबी गर्दै आएका छन्।  

उनीहरूको आरोप छ कि सभामुखले विपक्षीको असहमति बेवास्ता गर्दै बहुमतको बलमा प्रक्रिया अघि बढाएका थिए।

आजको बैठकमा आर्थिक वर्ष २०८३/८४ को बजेटमाथिको छलफल सुरु गर्ने कार्यसूची रहे पनि राजनीतिक विवादका कारण संसद्को नियमित कामकारबाही प्रभावित हुने संकेत देखिएको छ।  

प्रधानमन्त्रीको अभिव्यक्तिलाई लिएर शुरु भएको विवाद अब संसद्को गतिरोधमा रूपान्तरण हुने खतरा बढेको छ।

संसद् भवन परिसरमा सत्तापक्ष र विपक्षी दलका नेताहरूबीच परामर्श जारी रहेकाले बैठक केहीबेरपछि बस्ने वा पुनः स्थगित हुने भन्ने विषय अझै अनिश्चित रहेको छ।