विपक्षीको अवरोधपछि प्रतिनिधिसभा बैठक भोलिसम्मका लागि स्थगित

काठमाण्डौ । प्रतिनिधिसभाको बैठक पुनः अवरुद्ध भएको छ  । सभामुख डीपी अर्यालले बैठक भोलि बिहान ११ बजेसम्मका लागि स्थगित गरेका हुन् ।  

विपक्षी दलका सांसदहरूले आफ्नो विरोध जारी राखेपछि निर्धारित कार्यसूची अघि बढाउन नसकिएको हो।

बैठक शुरु हुनासाथ विपक्षी सांसदहरू आ–आफ्नो स्थानबाट उठेर विरोध जनाएका थिए। 

उनीहरूले प्रधानमन्त्री बालेन शाहले नेपाल–भारत सीमा सम्बन्धी दिएको अभिव्यक्तिप्रति आपत्ति जनाउँदै त्यस विषयमा स्पष्ट धारणा र जवाफ माग गरेका छन्।

विपक्षी दलहरूको आरोप अनुसार प्रधानमन्त्री शाहले नेपालले भारतीय सीमा मिचेको भन्ने आशय व्यक्त गर्ने गरी सार्वजनिक अभिव्यक्ति दिएका थिए, जसले राष्ट्रिय हित र सार्वभौमिकतासँग सम्बन्धित संवेदनशील विषयमा भ्रम सिर्जना गरेको उनीहरूको भनाइ छ।

यही विषयलाई लिएर विपक्षी दलहरूले सदनमा निरन्तर अवरोध गर्दै आएका छन्।

विपक्षी सांसदहरूले प्रधानमन्त्रीले आफ्नो अभिव्यक्तिबारे आत्मालोचना गर्दै संसद् र जनतासमक्ष माफी माग्नुपर्ने माग राखेका छन्।  

 

उनीहरूले माग सम्बोधन नभएसम्म संसद्को कारबाही सहज रूपमा सञ्चालन हुन नदिने चेतावनीसमेत दिएका छन्।

सदनको अवरोध हटाउन सभामुखले दलहरूबीच सहमति खोज्ने प्रयास गरे पनि तत्काल सहमति जुट्न नसकेपछि बैठक सञ्चालन गर्न कठिन भएको थियो।  

त्यसपछि सभामुख अर्यालले संसद्को बैठक भोलि बिहान ११ बजेसम्मका लागि स्थगित भएको जानकारी गराएका थिए ।  

संसद्को निरन्तर अवरोधका कारण विधेयकहरू, नीति तथा कार्यक्रमसम्बन्धी छलफल र अन्य संसदीय कार्यहरू प्रभावित भइरहेका छन्।  

राजनीतिक दलहरूबीच संवाद र सहमतिमार्फत उत्पन्न गतिरोधको निकास खोज्न दबाब बढ्दै गएको छ।